ستەپنوگورسك قالالىق سوتى ەكىنشى دەڭگەيلى بانك بولىمشەسىنىڭ ديرەكتورى مەن كاسسيردى جالپى سوماسى 255 ميلليون تەڭگەنى جىمقىرعانى ءۇشىن جەتى جىلعا باس بوستاندىعىنان ايىرۋعا سوتتادى. بۇل تۋرالى infohub.kz سايتى حابارلايدى.
اقمولا وبلىستىق سوتىنىڭ ءباسپاسوز قىزمەتىنىڭ مالىمەتىنشە، بانك بولىمشەسىنىڭ ديرەكتورى ش. كاسسير ك.-مەن ءسوز بايلاسىپ، نەسيە مەكەمەسىنىڭ اقشاسىن جىمقىرۋدى ۇيىمداستىرعان. 2022 جىلعى قاراشادان جەلتوقسانعا دەيىن كاسسير باسشىنىڭ نۇسقاۋى بويىنشا قويمادان 1، 3، 8 ميلليون تەڭگە سومالارىن الىپ شىعىپ، وعان تاپسىرىپ وتىرعان. ديرەكتور قىزمەتكەرگە اقشا سالاتىن پاكەتتەر مەن ريۋكزاكتى الدىن الا بەرىپ، كەيىن ولاردى بانك عيماراتىنان الىپ شىققان. تەكسەرۋ اكتىسى بويىنشا كەمشىلىك سوماسى 255 ميلليون تەڭگەدەن اسقان.
ايىپتالۋشىلاردىڭ كىناسى دالەلدەمەلەر جيىنتىعىمەن راستالدى: تەكسەرۋ اكتىسى، اۋديتورلىق قورىتىندى، كەمشىلىك تۋرالى ساراپتاما، كۋالاردىڭ ايعاقتارى، ايىپتالۋشىلاردىڭ وزدەرىنىڭ مويىنداۋ ايعاقتارى، بانك بەينەباقىلاۋ كامەرالارىنىڭ جازبالارى جانە ءىستىڭ باسقا دا ماتەريالدارى.
سوت ايىپتالۋشىلاردىڭ ارەكەتىن جىمقىرۋ، ياعني بوتەننىڭ مۇلكىن الدىن الا ءسوز بايلاسۋ ارقىلى ءبىر توپ ادامنىڭ قىزمەت بابىن پايدالانىپ، اسا ءىرى مولشەردە جىمقىرۋى دەپ باعالادى (قازاقستان رەسپۋبليكاسى قىلمىستىق كودەكسىنىڭ 189-بابى 4-بولىگىنىڭ 2-تارماعى). جەڭىلدەتەتىن ءمان-جايلار رەتىندە ديرەكتوردىڭ شىن جۇرەكتەن وكىنۋى، سونداي-اق كاسسيردىڭ جاسىنىڭ كىشىلىگى جانە وڭ مىنەزدەمەسى تانىلدى.
سوت ۇكىمىمەن ش. مەن ك.-گە ءارقايسىسىنا جەتى جىل باس بوستاندىعىنان ايىرۋ جازاسى، سونداي-اق بەس جىل مەرزىمگە ۇيىمدار مەن مەكەمەلەردە ماتەريالدىق جاۋاپتى لاۋازىمداردى اتقارۋ قۇقىعىنان ايىرۋ تاعايىندالدى. زياندى وتەۋ بولىگىندە جابىرلەنۋشىگە ازاماتتىق سوت ءىسىن جۇرگىزۋ تارتىبىمەن سوتقا جۇگىنۋ قۇقىعى ءتۇسىندىرىلدى. ۇكىم زاڭدى كۇشىنە ەنگەن جوق. الدىن الۋ ماقساتىندا ۇكىمدى جاريالاۋ كەزىندە بانك فيليالىنىڭ قىزمەتكەرلەرى قاتىستى.