ستەپنوگورسكىدە 40 جاستاعى ايەل، الدىن الا مالىمەتتەر بويىنشا، الكوگولدىك ماساڭ كۇيدە بولعان، پوليسيا قىزمەتكەرىنە شابۋىل جاساپ، ونىڭ بەتى مەن موينىن تىرناپ تاستاعان، دەپ حابارلايدى infohub.kz سايتى.
وقيعا 15 تامىزدا ساعات 00:30 شاماسىندا بولعان. پوليسيا باسقارماسىنىڭ كەزەكشى بولىمىنە تۇرعىن ۇيدەگى تىنىشتىقتى بۇزۋ تۋرالى حابارلاما تۇسكەن. وقيعا ورنىنا كەلگەن پاترۋلدىك پوليسەيلەر كورسەتىلگەن پاتەردەن قاتتى مۋزىكانىڭ داۋىسىن ەستىگەن. ەسىكتى ولارعا 40 جاستاعى ايەل اشقان، ول الدىن الا مالىمەتتەر بويىنشا، الكوگولدىك ماساڭ كۇيدە بولعان.
ول پوليسيا قىزمەتكەرلەرىنىڭ تىنىشتىقتى بۇزۋدى توقتاتۋ جانە مەديسينالىق كۋالاندىرۋدان ءوتۋ تۋرالى زاڭدى تالاپتارىنا اگرەسسيۆتى جاۋاپ بەرىپ، بالاعات سوزدەر ايتىپ، پوليسەيلەردىڭ تالاپتارىن ورىنداۋدان باس تارتقان. تۋىنداعان جانجال بارىسىندا ايەل پوليسيا قىزمەتكەرلەرىنىڭ ءبىرىن يتەرىپ جىبەرگەن، سودان كەيىن پودەزگە جۇگىرىپ شىعىپ، وعان لاپ قويىپ، بەتى مەن موينىنا تىرناق سالعان.
بيلىك وكىلىنە قاتىستى زورلىق-زومبىلىق قولدانۋ فاكتىسى بويىنشا سوتقا دەيىنگى تەرگەۋ باستالعان. وقيعانىڭ ءمان-جايى انىقتالىپ جاتىر.
پوليسيا قوعامدىق ءتارتىپتى ساقتاۋ جانە قۇقىق قورعاۋ ورگاندارى قىزمەتكەرلەرىنىڭ زاڭدى تالاپتارىن ورىنداۋ قاجەتتىگىن ەسكە سالدى. «الكوگولدىك ماساڭ كۇيدە جانجال جاعدايلارىن بولدىرماۋعا ەرەكشە نازار اۋدارۋ كەرەك. قوعامدىق ءتارتىپتى بۇزۋ، سونداي-اق بيلىك وكىلدەرىنە قاتىستى زورلىق-زومبىلىق قولدانۋ قازاقستان رەسپۋبليكاسىنىڭ زاڭناماسىنا سايكەس جاۋاپكەرشىلىككە اكەپ سوعادى»، — دەپ قوستى پوليسيادا.