مەملەكەتتىك ەمحانالاردا تار مامانداردىڭ جوقتىعى قازاقستاندىقتاردى قابىلداۋ مەن تەكسەرۋدى جەكەمەنشىك كلينيكالاردا اقىلى جاساۋعا ماجبۇرلەپ وتىر. Threads الەۋمەتتىك جەلىسىنىڭ قولدانۋشىسى بەكبولات حۋانبايەۆ كەنەتتەن شىققان بورتپەنى ەمدەۋ ارەكەتى ءبىر ايلىق ستيپەندياسىنا تەڭ سوماعا تۇسكەنىن ايتتى، دەپ حابارلايدى infohub.kz سايتى.
«بۇگىن قازاقستاندا اۋىرىپ قالۋ دا — ءسان-سالتانات ەكەنىن ءتۇسىندىم. دەنەمە بورتپە شىقتى. كۇتپەيىن دەپ، تىركەلگەن جەرىمدەگى مەملەكەتتىك ەمحاناعا باردىم. دەرماتولوگ جوق. كەلەسى ايدا كەلىڭىز»، — دەپ جازادى قازاقستاندىق.
بەكبولات دارىگەرگە بورتپەنىڭ سول كۇنى شىققانىن جانە قارالۋ قاجەتتىگىن ءتۇسىندىردى. سودان كەيىن ونى اقىلى كلينيكاعا جىبەردى.
«قولجەتىمدى كلينيكا رەتىندە ۇسىنىلعان ەميرمەدكە باردىم. دەرماتولوگ قابىلداۋى 7 000 تەڭگە. جارايدى. دارىگەر ەكى اناليز تاعايىندادى»، — دەپ جازدى ول.
قازاقستاندىق ءقازىر ستۋدەنت ەكەنىن جانە تەكسەرۋ مەن ەمدەۋدى قوسا ەسەپتەگەندە 15–20 مىڭ تەڭگەگە سىيعىزۋدى جوسپارلاعانىن ناقتىلادى.
«ءبىراق ماعان شوت قويعاندا (…)، ەكى اناليز ءۇشىن 49 000 تەڭگە بولدى. بۇل — مەنىڭ بۇكىل ستيپەندياما. ونىڭ ۇستىنە ءدارى دە ساتىپ الا قويعان جوقپىن. ەندى وتىرىپ ويلانامىن: قالاي ەمدەلۋىم كەرەك؟ مەديسيناعا اقى تولەۋگە قارسى ەمەسپىن. دارىگەرلەر وقىعانىن، قۇرال-جابدىقتىڭ اقشا تۇراتىنىن تۇسىنەمىن. ءبىراق قاراپايىم ستۋدەنت نەگە اناليز تاپسىرۋ، ءدارى الۋ نەمەسە ءبىر اي ءومىر ءسۇرۋ اراسىندا تاڭداۋ جاساۋى كەرەك؟ مەملەكەتتىك اۋرۋحانادا — دەرماتولوگ جوق. اقىلىسىندا — 49 مىڭدىق اناليزدەر»، — دەپ سۇراق قويدى قازاقستاندىق.
پىكىرلەردە قازاقستاندىققا ونىڭ ناقتى جاعدايىندا «از شىعىنمەن» قۇتىلۋعا بولاتىنىن، بۇكىل ستيپەنديانى جۇمساۋدىڭ قاجەتى جوقتىعىن ايتتى. اتاپ ايتقاندا، قولدانۋشىلار وبلىستىق تەرى-ۆەنەرولوگيالىق ديسپانسەرگە تىركەلۋسىز-اق بارۋعا بولاتىنىن جەتكىزدى.
«تەرى-ۆەنەرولوگيالىق ديسپانسەردە ءارقاشان تەگىن قابىلدايتىن. قابىلداۋ، اناليز تاپسىرۋ — ءبارى تەگىن»، — دەپ جازدى marzhan62168 قولدانۋشىسى.
الايدا باسقا پىكىر قالدىرۋشىلار ماسەلە تەك مەملەكەتتىك ەمحانالارداعى دەرماتولوگتاردا ەمەس ەكەنىن اتاپ ءوتتى. تار ماماندار جەتىسپەيدى، ولارعا كەزەك تە جازىلعان، سوندىقتان قازاقستاندىقتار ءجيى جەكەمەنشىك كلينيكالاردا اقشا جۇمساۋعا ءماجبۇر.
«بۇل ماسەلەنى مەملەكەتتىك دەڭگەيدە كوتەرۋ كەرەك. كوبىسى قارجى جوقتىقتان ۋاقىتىندا ەمدەلمەيدى، كەيبىرەۋلەر ءۇشىن ءبارى ولىممەن اياقتالادى»، — دەپ جازدى ma_cherie777s قولدانۋشىسى.
بۇعان دەيىن «كۋرسيۆ» 2026 جىلدىڭ قاڭتار قورىتىندىسى بويىنشا ەلدە دەنساۋلىق ساقتاۋ قىزمەتتەرى ءبىر جىلدا 17%-دان استام قىمباتتاعانىن، ال كەيبىر باعىتتار بويىنشا باعا ءوسىمى 40%-عا جەتكەنىن جازعان.