سۋداننىڭ دارفۋر ايماعىنداعى ازاماتتىق سوت عيماراتىنا جاسالعان درون شابۋىلى سالدارىنان كەمىندە 35 ادام قازا تاپتى. بۇل تۋرالى قۇقىق قورعاۋ ۇيىمى حابارلادى. وقيعا سولتۇستىك دارفۋر شتاتىنداعى ءال-زاۋيا گارا اۋىلىندا بولعان. تاۋەلسىز قۇقىق قورعاۋ توبى Emergency Lawyers مالىمەتىنشە، جەكسەنبى كۇنى تۇستەن كەيىن اسكەري دروندار ايماقتاعى ازاماتتىق سوت عيماراتىنا شابۋىل جاساعان. بۇل عيمارات ايماقتا سوت ءارى الەۋمەتتىك قىزمەت اتقاراتىن ازاماتتىق نىسان بولىپ تابىلادى. ۇيىم بۇل ارەكەتتى حالىقارالىق گۋمانيتارلىق قۇقىقتىڭ ورەسكەل بۇزىلۋى دەپ باعالاپ، تەرگەۋ جۇرگىزۋدى تالاپ ەتتى.
سۋداندا 2023 جىلدىڭ ءساۋىر ايىنان بەرى جالعاسىپ كەلە جاتقان قارۋلى قاقتىعىس سالدارىنان كەمىندە 59 مىڭ ادام قازا تاپقان. بۇل دەرەكتەردى قاقتىعىستاردى باقىلايتىن Armed Conflict Location & Event Data ۇيىمى كەلتىرگەن. الايدا كومەك ۇيىمدارى بۇل كورسەتكىش تولىق ەمەس دەپ سانايدى، ناقتى قۇرباندار سانى بىرنەشە ەسە جوعارى بولۋى مۇمكىن.
درون سوعىسى ەلدەگى قاقتىعىستىڭ ايرىقشا بەلگىسىنە اينالعان، ەكى تاراپ تا درون شابۋىلدارىن قولدانادى. بۇۇ مالىمەتىنشە، درون شابۋىلدارى ءقازىر سۋدانداعى ءولىمنىڭ نەگىزگى سەبەبىنە اينالعان، 2026 جىلدىڭ العاشقى ءتورت ايىندا ازاماتتىق تۇرعىندار اراسىنداعى ءولىمنىڭ 80 پايىزى وسى شابۋىلداردىڭ سالدارىنان بولعان. سۋدان اسكەرى بۇل وقيعاعا قاتىستى پىكىر بىلدىرگەن جوق.