سۋدان اسكەرىنىڭ دارفۋر ايماعىنىڭ سولتۇستىگىندەگى ءداستۇرلى سوت وتىرىسىنا جاساعان درون شابۋىلى سالدارىنان 35 ادام قازا تاپتى. بۇل تۋرالى جەرگىلىكتى قۇقىق قورعاۋ ۇيىمى حابارلادى. جەكسەنبى كۇنى تۇستەن كەيىن بولعان شابۋىلدا تاعى ونداعان ادام جاراقات العان.
ازاماتتارعا قارسى زورلىق-زومبىلىقتى باقىلايتىن توتەنشە جاعداي زاڭگەرلەر توبىنىڭ مالىمەتىنشە، شابۋىل جارعا ءال-زاۋيا اۋىلىندا بولعان. بۇل اۋماقتى جارتىلاي اسكەريلەندىرىلگەن جىلدام قولداۋ كۇشتەرى (RSF) باقىلايدى. سۋدان اسكەرى بۇل وقيعاعا تۇسىنىكتەمە بەرگەن جوق.
RSF ەلدىڭ باتىسىنداعى دارفۋردىڭ باسىم بولىگىن ءوز باقىلاۋىندا ۇستاپ وتىر. ءۇش جىلعا سوزىلعان ازاماتتىق سوعىس ەلدى كۇيرەتىپ، ونداعان مىڭ ادامنىڭ ءومىرىن قيدى، ميلليونداعان ادامدى ۇيلەرىنەن ايىردى.
AFP اگەنتتىگىنىڭ كۋاگەرگە سىلتەمە جاساۋىنشا، جەكسەنبى كۇنگى «سوت وتىرىسى اعاش استىندا، جەرگىلىكتى قوعامداستىق كوشباسشىلارىنىڭ قاتىسۋىمەن ءوتىپ جاتقان». كۋاگەردىڭ ايتۋىنشا، شابۋىلدا ءتورت تايپا كوشباسشىسى مەن ەكى RSF كومانديرى قازا تاپقان.
جەكە مەنشىك «دارفۋر 24» سايتى جەرگىلىكتى تۇرعىنعا سىلتەمە جاساپ، ەكى درون قالا ۇستىنەن ۇشىپ ءوتىپ، «تورتتەن استام زىمىران» اتقانىن حابارلادى.
توتەنشە جاعداي زاڭگەرلەر توبى درون شابۋىلىن تەرگەۋدى تالاپ ەتىپ، سوتقا جاسالعان شابۋىلدى ايىپتادى. ولار ازاماتتار مەن ازاماتتىق ينفراقۇرىلىمعا جاسالعان شابۋىلدار حالىقارالىق گۋمانيتارلىق قۇقىقتىڭ «ورەسكەل بۇزىلۋى» ەكەنىن اتاپ ءوتتى.
سونداي-اق، درونداردىڭ «ازاماتتىق ايماقتار مەن جيىندارعا باعىتتالعان شابۋىلداردا» ءجيى قولدانىلىپ جاتقانى، بۇل حالىققا تونەتىن ءقاۋىپتى كۇشەيتەتىنى ايتىلدى.
RSF سوڭعى ءۇش جىلدا ازاماتتارعا درون شابۋىلدارىن قوسا العاندا، سوعىس قىلمىستارى جاسادى دەپ ايىپتالۋدا. بۇۇ فاكتىلەردى انىقتاۋ ميسسياسىنىڭ مالىمەتىنشە، بىلتىرعى جىلى RSFء-تىڭ دارفۋرداعى ءىرى قالالاردىڭ ءبىرى — ال-فاشەردى قورشاۋى مەن شابۋىلى «گەنوسيد بەلگىلەرىن» كورسەتكەن. RSF بۇل ايىپتاۋلاردى جوققا شىعاردى.