ۇلىبريتانيانىڭ سۋيندون قالاسىنىڭ تۇرعىنى ۇلتتىق قاۋىپسىزدىككە قاتىستى قىلمىستار ءۇشىن ايىپتالدى. بۇل تۋرالى لوندوننىڭ تەرروريزمگە قارسى پوليسياسى جۇرگىزىپ جاتقان تەرگەۋ اياسىندا حابارلاندى، دەپ مالىمدەيدى مەتروپوليتەن پوليسياسى.
31 جاستاعى دجوشۋا كامميدج تەرروريزمگە قارسى پوليسيا قىزمەتكەرلەرى تاراپىنان 4 قىركۇيەكتە سۋيندونداعى ۇيىندە تۇتقىندالعان. وعان ۋيلتشير پوليسياسىنىڭ قىزمەتكەرلەرى كومەكتەسكەن. سونداي-اق، سۋيندونداعى تاعى ءبىر مەكەنجايدا ءتىنتۋ جۇرگىزىلگەن. كەلەسى كۇنى ول قايتادان ۇستالىپ، شەتەلدىك بارلاۋ قىزمەتىنە كومەكتەسۋ جانە ديۆەرسيا اكتىسىنە دايىندىق جاساۋ نيەتىمەن ارەكەت جاساۋ ايىپتارىمەن سوتقا بەرىلدى.
مەتروپوليتەن پوليسياسىنىڭ مالىمدەۋىنشە، كامميدجدىڭ تۇتقىندالۋى رەسەيدىڭ اسكەري بارلاۋ اگەنتتىگى باقىلايتىن GRU ەرىكتىلەر كورپۋسىنىڭ وكىلىمەن بايلانىستا بولۋىنا قاتىستى. بۇل توپ بۇرىن ۇلىبريتانيا مەن ونىڭ وداقتاستارىنا قارسى ديۆەرسيالىق ارەكەتتەر جاسادى دەپ ايىپتالعان.
كامميدج ايىپتالعان ۇلتتىق قاۋىپسىزدىك تۋرالى زاڭ 2023 جىلى قابىلدانعان. بۇل زاڭ قۇقىق قورعاۋ ورگاندارىنا تىڭشىلىق، شەتەلدىك ارالاسۋ نەمەسە ىقپال ەتۋ جانە ديۆەرسيا سياقتى قاۋىپتەردەن ۇلىبريتانيانى قورعاۋ ءۇشىن قوسىمشا شارالار قولدانۋعا مۇمكىندىك بەرەدى.
كورولدىك پروكۋرورلىق قىزمەتتىڭ ەرەكشە قىلمىستار جانە تەرروريزمگە قارسى ءبولىمىنىڭ باس پروكۋرورى فرەنك فەرگيۋسون: «كورولدىك پروكۋرورلىق قىزمەت تەرروريزمگە قارسى پوليسيا تەرگەۋىنەن كەيىن دجوشۋا كامميدجدى ۇلتتىق قاۋىپسىزدىك تۋرالى زاڭ بويىنشا ايىپتاۋدى ۇيعاردى. ءبىزدىڭ پروكۋرورلار ءىستى سوتقا جەتكىزۋ ءۇشىن جەتكىلىكتى دالەلدەمەلەر بار ەكەنىن جانە قىلمىستىق ءىس جۇرگىزۋ قوعامدىق مۇددەگە ساي ەكەنىن انىقتادى. ءبىز بارلىعىن ەسكەرتەمىز: سوتتالۋشىعا قاتىستى ءىس جۇرگىزۋ جالعاسۋدا، ونىڭ ءادىل سوتتالۋ قۇقىعى بار. ىسكە قانداي دا ءبىر تەرىس اسەر ەتۋى مۇمكىن كەز كەلگەن اقپاراتتى تاراتۋعا، پىكىر بىلدىرۋگە نەمەسە ونلاين بولىسۋگە جول بەرىلمەيدى»، — دەدى.
كامميدج 10 قىركۇيەكتە ۆەستمينستەر ماگيستراتتىق سوتىنا كەلەدى.