InfoHub Logo

ەرتە زاماندا سيىر سىزىلعان كەربەز، سۋىرىلا شاپقان جۇيرىك بولىپتى. ءارى اسقان تاكاپپار، ماقتانشاق تا ەكەن.

         ءبىر كۇنى الگى سيىر اتپەن ەرەگىسىپ قالىپ، ەكەۋى جارىسقا تۇسۋگە ۋادە بايلاسادى. بۇرىنعى وتكەن جارىستاردىڭ بارىندە سيىر بايگە بەرمەيدى ەكەن. وسى جولى اتتان دا وزىپ، ءتورت اياقتى جانۋارلاردىڭ اراسىنداعى ەڭ جۇيرىگى دەگەن اتاققا ءبىرجولا يە بولۋدى ماقسات ەتەدى.

         كومبەگە تورەشى بولىپ ارىستان كەلەدى. ءباستىڭ جايىن ۇققان سوڭ، ات پەن سيىردى ءبىر كۇنشىلىك جولعا جولبارىس ايداپ بارىپ، ەكەۋىن قاتار تۇرعىزىپ قويادى دا وكىرىپ تۇرىپ، كەرى قايتۋعا بەلگى بەرەدى.

         قۇيرىعىن كوككە شانشىپ الىپ، تاناۋى پىسىلداپ، سيىر ءا  دەگەننەن-اق قاراسىن ءۇزىپ، زۋلاي جونەلەدى.

         سيىردىڭ ارتىنان جەلدەي جۇيتكىپ، ۇدەي شاۋىپ، ات كەلە جاتادى. جول ورتاسىندا باسەكەلەسۋشىلەرگە سۋسىن بەرۋ ءۇشىن سۋىر توسىپ وتىرادى.

         ءبىر كەزدە وزا شاۋىپ، ەلىرگەن سيىر سۋىرعا جەتىپ كەلەدى دە:

         — سۋىر ساسىق، سۋ قايدا؟ – دەيدى.

         سيىردىڭ تاكاپپار مىنەزىنە رەنجىپ قالعان سۋىر:

         — سيىر ساسىق، سۋ مۇندا، – دەپ، ساسىپ، بورسىپ كەتكەن لاي سۋدى ۇستاتا سالادى. شاڭىرقاپ، شولدەپ كەلگەن سيىر سۋدىڭ قانداي ەكەنىنە قاراماستان، ءسىمىرىپ جىبەرەدى دە ودان ءارى شاپقىلاي جونەلەدى.

         ارى-بەرىدەن سوڭ، سۋىردىڭ قاسىنا شارشاپ، شولدەپ ات كەلەدى.

         — سۋىر سۇڭقار، سۋ قايدا؟ – دەيدى ەركەلەتىپ.

         — جىلقى تۇلپار، سۋ مۇندا! – دەپ، سۋىر ءمولدىر، تۇنىق سۋدى اتقا ۇستاتا بەرەدى. تازا، تۇنىق سۋعا قانىپ العان ات بويىنا تىڭ قۋات قوسىلعانداي بولىپ، قۇستاي ۇشىپ، سامعاي جونەلەدى.

         ساسىق، لاي سۋ كەۋدەسىن الىپ قالعان سيىر ونشا ۇزاپ كەتە المايدى دا ەكى-ۇش قىردى اسقان سوڭ، ونى ات قۋىپ جەتىپ، جانىنان جەلدەي جۇيتكىپ وتە شىعادى. سودان كومبەگە ءبىرىنشى بولىپ جەتەدى.

         سودان بەرى جىلقى ءتورت اياقتى جانۋارلاردىڭ ىشىندەگى جۇيرىگى بولىپ قالىپتى. كەۋدەسىن لاي، ساسىق سۋ الىپ قالعان سيىر سودان بەرى شابانداپ، جۇگىرە المايتىن كۇيدە قالادى. سيىردىڭ جاتقان كەزدە ىڭىرانا كۇرسىنەتىنى - ءوزىنىڭ استامشىلىق ەتىپ، سۋىرعا ايتقان دورەكى سوزىنە كۇنى بۇگىنگە دەيىن وكىنگەنى ەكەن دەسەدى.

---