ۇلتتىق بانك ءتوراعاسى تيمۋر سۇلەيمەنوۆ بريفينگتە قارجى رەتتەۋشىسىنىڭ ۇكىمەتكە تاۋەلسىزدىك دارەجەسىن ءتۇسىندىردى، دەپ حابارلايدى infohub.kz سايتى.
سۇلەيمەنوۆ ۇلتتىق بانكتىڭ وكىلەتتىكتەرى ەل زاڭناماسىندا بەكىتىلگەنىن اتاپ ءوتتى. «ۇلتتىق بانك تۋرالى» زاڭنىڭ اقشا-كرەديت ساياساتىن جۇزەگە اسىرۋدا ۇلتتىق بانكتىڭ تاۋەلسىز ەكەندىگى ناقتى كورسەتىلگەن بابى بار. ءبىراق 24-باپتا ۇلتتىق بانك ءوز ماقساتتارى مەن مىندەتتەرىن ىسكە اسىرۋ بارىسىندا نەگىزگى فۋنكسياسىنا كەدەرگى كەلتىرمەيىنشە، ۇكىمەتتىڭ ەكونوميكالىق ءوسۋ ساياساتىن ەسكەرەتىنى ايتىلعان. ءبىز ءدال وسى زاڭنامالىق قاعيداتتى ۇستانامىز»، — دەدى ول.
ونىڭ ايتۋىنشا، بۇل ەكونوميكالىق ءوسۋ ماقساتتارى ينفلياسيانى تومەندەتۋ ماقساتتارىمەن تىكەلەي قايشىلىققا تۇسكەنشە جالعاسادى. «ەكونوميكالىق ءوسۋ — ءاربىر مەملەكەتتىك ورگاننىڭ مىندەتى، تەك ۇلتتىق بانكتىڭ نەمەسە ۇكىمەتتىڭ عانا ەمەس. ءاربىر مەملەكەتتىك ورگان ەكونوميكالىق ءوسۋدى جانە دامۋدى قامتاماسىز ەتۋى ءتيىس. سوندىقتان بۇل سۇراققا زاڭنامالىق جاۋاپ بەرىلگەن. پراكتيكالىق تۇرعىدان ءبىز ءدال وسىلاي جۇزەگە اسىرامىز»، — دەپ ءتۇسىندىردى ول.
ۇلتتىق بانك ءتوراعاسى ينفلياسيا بولجامىنىڭ قايتا قارالۋىن دا ءتۇسىندىردى. «ءبىز، ارينە، ماقساتقا ەرتەرەك جەتكىمىز كەلەر ەدى (ينفلياسيانى ءبىر تاڭبالى كورسەتكىشكە دەيىن تومەندەتۋ — رەد.)، ءبىراق تاريفتەردىڭ ءوسۋى، جانار-جاعارماي باعاسىنىڭ ءوسۋى، ۇكىمەت بۇرىن كەيىنگە قالدىرىلعاندىقتان كوپ جاعدايدا جۇزەگە اسىرۋعا ءماجبۇر بولىپ وتىرعان ءبىرقاتار باسقا دا رەفورمالار مەن جاڭالىقتار سياقتى بولماي قويمايتىن نارسەلەر بار ەكەنىن كورىپ وتىرمىز. وسىعان سۇيەنە وتىرىپ، كەيىن سىزدەرگە كەلىپ: "مىنە، ءبىز ورىنداي المادىق" دەپ ايتۋ ءۇشىن مەرزىمدەردى ەرتەرەك قويۋ دۇرىس بولماس ەدى. ءبىز ەكونومەتريالىق مودەلدەر تۇرعىسىنان تولىق ەسەپتەلگەن بولجامدى ۇسىنىپ وتىرمىز جانە وعان سايكەس بۇل 2028 جىلى بولاتىنىن كورىپ وتىرمىز. دەگەنمەن، ءبىز، ارينە، ەرتەرەك قالايمىز. ءبىراق ەكونوميكالىق ءوسۋ مەن حالىقتىڭ ءال-اۋقاتى مۇددەلەرىن ەسكەرۋ ءۇشىن ءبىز وسىنداي تراەكتوريامەن ءجۇرۋىمىز كەرەك»، — دەپ ءتۇسىندىردى ول.