ۇلىبريتانياعا ورالعان ساسسەكس گەرسوگى گارري مەن گەرسوگينياسى مەگاننىڭ مەملەكەت ەسەبىنەن قارجىلاندىرىلاتىن قاۋىپسىزدىگى قايتا قارالاتىن بولدى. پاتشا اۋلەتى مەن مەملەكەتتىك تۇلعالاردىڭ سالىق ەسەبىنەن قورعالۋىن قاداعالايتىن پاتشالىق جانە ايرىقشا تۇلعالار اتقارۋ كوميتەتى (راۆەك) جۇبايلارعا پوليسيا قورعاۋىنىڭ قانداي دەڭگەيدە بەرىلەتىنىن قايتا قاراستىرادى، دەپ حابارلايدى infohub.kz سايتى.
كوميتەت وتكەن اپتادا جۇبايلاردىڭ جاعدايىن تالقىلاۋ ءۇشىن جينالدى. ەندى ولار بالالارىمەن بىرگە ۇلىبريتانيادا ۋاقىتشا قوناق رەتىندە ەمەس، تۇراقتى تۇرعىن رەتىندە ءومىر ءسۇرىپ جاتىر.
بۇل — مەگان ءۇشىن العاشقى تاۋەكەل باعالاۋى. 2020 جىلى جۇبايلار پاتشا اۋلەتىنىڭ جۇمىس ىستەيتىن مۇشەلەرى قاتارىنان شىققان بولاتىن. گارريگە قاۋىپسىزدىگىن قايتا قاراۋ تۋرالى شەشىم شىلدەدە بەرىلگەن، الايدا ول ءالى كۇنگە دەيىن ناقتى جاۋاپ العان جوق.
The Telegraph باسىلىمىنىڭ مالىمەتىنشە، راۆەك ءتوراعاسى وتكەن اپتادا گارريگە كوميتەت جاڭا تاۋەكەل باعالاۋىن، سونداي-اق مەگان ءۇشىن جەكە باعالاۋدى تاعايىنداعانىن، مۇنىڭ ءبارى ولاردىڭ ۇلىبريتانياعا ورالۋىنا بايلانىستى ەكەنىن جەتكىزگەن. كوميتەت جۇبايلاردان شەشىم قابىلداۋ ءۇشىن كۇندەلىكتى كەستەلەرى مەن ءتارتىبىن، سونىڭ ىشىندە بالالاردى مەكتەپكە اپارۋ-اكەلۋ جوسپارىن ۇسىنۋدى سۇراعان.
وتكەن جىلى گارري ىشكى ىستەر مينيسترلىگىنە قارسى سوت تالابىنان ۇتىلىپ قالدى. سەبەبى جۇبايلار پاتشا اۋلەتىنىڭ جۇمىس ىستەيتىن مۇشەلەرى قاتارىنان شىققان سوڭ، ول جانە ونىڭ وتباسى ءۇشىن اۆتوماتتى تۇردە بەرىلەتىن سالىق ەسەبىنەن قارجىلاندىرىلاتىن قاۋىپسىزدىك توقتاتىلعان ەدى.
« ۇلىبريتانيا — مەنىڭ ءۇيىم. ۇلىبريتانيا — بالالارىمنىڭ تاريحىنىڭ وزەگى ءارى ولار ءقازىر اقش-تا تۇراتىن جەرىندەي-اق ءوزىن ۇيدە سەزىنۋىن قالايتىن ورىن. ءبىراق ولار ۇلىبريتانيا جەرىندە بولعاندا قاۋىپسىزدىگىن قامتاماسىز ەتۋ مۇمكىن بولماسا، بۇل ورىندالمايدى. مەن ايەلىمدى وسىنداي قاۋىپكە تاستاي المايمىن. ومىردە باسىمنان وتكەن جاعدايلاردى ەسكەرسەك، ءوزىمدى دە بوسقا قاتەرگە تىگۋدى قالامايمىن»، — دەگەن گارري كۋالىك بەرۋ كەزىندە.
جۇبايلار ۇلىبريتانياعا 26 تامىزدا ورالدى. كوپ ۇزاماي كورول چارلز اتىنان رەسمي حات جولدانىپ، ولاردىڭ پاتشا اۋلەتىنىڭ جۇمىس ىستەمەيتىن مۇشەلەرى ەكەنى تاعى دا راستالدى. حاتتا جۇبايلار «كوممەرسيالىق جانە قايىرىمدىلىق مۇددەلەرى بار جەكە ازاماتتارعا ۇقسايدى» دەلىنگەن جانە «قاۋىپسىزدىككە قاتىستى كەز كەلگەن جەدەل ماسەلە ءتيىستى پوليسيا ورگاندارىنا جولدانۋى ءتيىس» دەپ كورسەتىلگەن.
سونىمەن قاتار دۇيسەنبىدە ساسسەكستەر بالالارىن جاڭا مەكتەپكە اۋىستىرۋعا شەشىم قابىلدادى. ولار بۇعان دەيىنگى مەكتەپتە نەبارى ەكى كۇن وقىعان بولاتىن. بۇعان ۇزاق جول مەن كەپتەلىستىڭ كوپتىگىنە بايلانىستى قاۋىپسىزدىك الاڭداۋشىلىعى سەبەپ بولعان.
«بالالاردىڭ مەكتەپ اۋىستىرۋى تۋرالى شەشىم وتباسىنىڭ قاۋىپسىزدىك توبىمەن قازىرگى جاعدايدىڭ تاجىريبەلىك جاقتارىن تالقىلاعاننان كەيىن قابىلداندى»، — دەدى وتباسىنىڭ وكىلى Hello! جۋرنالىنا. «اتا-اناسى بارلىق مۇعالىمدەر مەن قىزمەتكەرلەرگە وتباسىنا كورسەتكەن سۇيىسپەنشىلىگى، قامقورلىعى مەن ەڭبەگى ءۇشىن شەكسىز ريزا. بۇل شەشىمدى مەكتەپكە نەمەسە بالالاردىڭ سوندا العان ەرەكشە قامقورلىعىنا قاتىستى باعا رەتىندە قابىلداۋعا بولمايدى».