كوردىم دە كەلدىم،
قولىمدى بەردىم:
«سۇيەم سەنى، سۇلۋ قىز.
جۇرەگىم جانىپ،
ءسۇيۋىم انىق،
كۋا بولسىن كوپ جۇلدىز!»-
دەدىمدەتىلدەن،
قۇشاقتاپ بەلدەن،
قىسىپ سۇيە باستادىم.
جاقىنداي بەردىڭ،
قوينىما كىردىڭ،
«كەت!» دەمەدىڭ، قاشپادىڭ.
«سۇيەم» بوپ ءسوزىڭ،
مولدىرەپ كوزىڭ،
تاقادىڭ سەن بەتكە بەت.
ايرىلدىڭ ەستەن،
كۇندىزگى كۇشتەن،
ءتيىپ ىستىق ەتكە ەت...
ۇشۋعا ىڭكار
تۇرا ما تۇلپار
ءبىر جەردە ىلعي شاڭ جۇتىپ؟!
جەل ەدىم، ۇشتىم،
تالايدى قۇشتىم،
كەتىپپىن سەنى ۇمىتىپ.
بۇگىن سەن كورىپ،
قولىڭدى بەرىپ،
قايعىمەنەن قارايسىڭ:
«سەندىم مەن جازعان،
سۇيگەنىڭ جالعان،
الدادىڭ!»- دەپ جىلايسىڭ.
الداعانىم جوق،
ارباعانىم جوق،
سەن سوزىمە، سۇلۋ قىز!
تاپ سول ساعات
سۇيگەنىم حاق،
كۋا مىناۋ كوپ جۇلدىز!

---