ماڭعىستاۋ وبلىسىنىڭ تۇرعىنى 700 مىڭ تەڭگەگە التىن سىرعا ساتىپ الىپ، 70 جاسقا تولعان قايىن ەنەسىنە سىيلىققا بەرگەن. ءبىراق سىيلىق تابىس ەتىلگەننەن كەيىن نەبارى ءبىر جارىم ساعات وتكەندە سىرعا سىنىپ، ساتۋشى اقشانى قايتارۋدان باس تارتقان. الايدا ساۋدا دەپارتامەنتى ارالاسقان سوڭ، اقشا تولىعىمەن قايتارىلدى، دەپ حابارلايدى infohub.kz.
ماڭعىستاۋ وبلىسىنىڭ تۇرعىنى Instagram الەۋمەتتىك جەلىسى ارقىلى 700 مىڭ تەڭگەگە التىن سىرعا ساتىپ العان. ول بۇل سىيلىقتى قايىن ەنەسىنىڭ 70 جىلدىق مەرەيتويىنا ارناعان. سىرعانى تويعا شامامەن ءبىر اي قالعاندا ساتىپ الىپ، مەرەكەگە الدىن الا دايىندالعان. الايدا سىيلىق تابىستالعاننان كەيىن ءبىر جارىم ساعات وتكەندە سىرعالاردىڭ ءبىرى سىنىپ كەتكەن: ول ورتاسىنان جارىلىپ، ەكى بولىككە بولىنگەن. كەيىن بۇيىمنىڭ قوسىلۋ ەلەمەنتى وتە جىڭىشكە بولىپ جاسالعانى انىقتالعان.
تۇتىنۋشى ساتۋشىعا تاۋاردى اۋىستىرۋدى نەمەسە اقشاسىن قايتارۋدى تالاپ ەتكەن. ساتۋشى ساتىپ الۋدان ءبىر اي وتكەنىن سىلتاۋراتىپ، تالاپتى قاناعاتتاندىرۋدان باس تارتقان. وسىدان كەيىن تۇتىنۋشى ماڭعىستاۋ وبلىسى بويىنشا ساۋدا جانە تۇتىنۋشىلار قۇقىن قورعاۋ دەپارتامەنتىنە جۇگىنگەن. ماماندار «تۇتىنۋشىلار قۇقىن قورعاۋ تۋرالى» ق ر زاڭى اياسىندا جۇمىس جۇرگىزىپ، بۇزىلعان قۇقىقتاردى قالپىنا كەلتىرۋگە كومەكتەسكەن. ناتيجەسىندە ساتۋشى تاۋاردىڭ تولىق قۇنى – 700 مىڭ تەڭگەنى قايتارعان.
ۆەدومستۆو قىزمەتكەرلەرى ەسكە سالادى: ەگەر ءسىز ساپاسىز تاۋار ساتىپ الساڭىز نەمەسە تۇتىنۋشى رەتىندە قۇقىعىڭىز وزگەشە بۇزىلسا، زاڭدى مۇددەڭىزدى قورعاۋ ءۇشىن دەپارتامەنتكە جۇگىنۋىڭىزگە بولادى.