اباي وبلىسىنىڭ كوكپەكتى اۋدانىندا ءۇش ۋچاسكەدە تابيعي ءورتتى ءسوندىرۋ جۇمىستارى جالعاسۋدا. ءورتتى جويۋعا تجم مەن جەرگىلىكتى اتقارۋشى ورگانداردىڭ شامامەن 180 ادامى مەن 26 تەحنيكاسى جۇمىلدىرىلدى، دەپ حابارلايدى infohub.kz سايتى.
سونداي-اق، سۋ توگەتىن قۇرىلعىسى بار تجم «قازاۆياقۇتقارۋ» تىكۇشاعى ءورت سوندىرۋگە تارتىلدى. اۆياسيا 22 ءتۇسىرىلىم جاساپ، 66 توننا سۋ جۇمسادى.
«ءورتتى سوندىرۋگە قاتتى جەل، كۇردەلى جەر بەدەرى جانە قۇرعاق وسىمدىكتەر كەدەرگى كەلتىرۋدە. قۇتقارۋشىلار مەن تارتىلعان كۇشتەر جەكەلەگەن ءورت وشاقتارىن جويۋ جۇمىستارىن جالعاستىرۋدا»، — دەپ حابارلادى تجم.
ۆەدومستۆو مامانداردىڭ جاعدايدى ۇنەمى باقىلاپ، ءورتتىڭ ودان ءارى تارالۋىنا جول بەرمەۋ ءۇشىن شارالار قابىلداپ جاتقانىن قوستى.
«جاعداي تجم باقىلاۋىندا»، — دەپ اتاپ ءوتتى قۇتقارۋشىلار.
ال قاراعاندى وبلىسىنىڭ قارقارالى اۋدانىندا ءجاڭاتوعان اۋىلىنىڭ ماڭىنداعى تابيعي ءورتتى وقشاۋلاۋ مۇمكىن بولدى. ءورت تاۋلى-دالالى جەردە بولعان. ونى سوندىرۋگە تجم بولىمشەلەرىنىڭ، جەرگىلىكتى اتقارۋشى ورگانداردىڭ جانە ەرىكتى قۇرامالاردىڭ 153 ادامى مەن 51 تەحنيكاسى جۇمىلدىرىلدى.
«قازىرگى ۋاقىتتا جەكەلەگەن تۇتىندەۋ وشاقتارىن جويۋ جانە اۋماقتى كۇزەتۋ جۇمىستارى جالعاسۋدا»، — دەدى تجم وكىلدەرى.
ەلدى مەكەندەرگە ءقاۋىپ جوق. ءورت تولىق جويىلعانشا جۇمىستار جالعاسادى.
الدىڭعى كۇنى توتەنشە جاعدايلار ۆيسە-مينيسترى راميل كامالوۆ، قاراعاندى وبلىسى تجد باستىعى مارعۇلان امانبايەۆ جانە وبلىس اكىمىنىڭ ورىنباسارى رۋسلان كەنجەبەكوۆ ايماقتا 11 تامىزدان بەرى ءسوندىرىلىپ جاتقان تابيعي ءورت اۋماعىن اۋەدەن تەكسەردى. ۇشۋ قورىتىندىسى بويىنشا كۇشتەر مەن تەحنيكا قايتا ءبولىندى.