تامىزداعى ۇبت-نى 27 مىڭنان استام ادام تاپسىردى، دەپ حابارلايدى infohub.kz سايتى.
تالاپكەرلەردىڭ 53%-ى شەكتى بالل جينادى. بەس ءپان بويىنشا ورتاشا بالل – 55. ماكسيمالدى بالل – 136.
«ۇبت وتكىزۋ كەزەڭىندە ەرەجە بۇزۋدىڭ 66 فاكتىسى انىقتالدى. ونىڭ ىشىندە سمارتفون، شپارگالكا جانە باسقا دا تىيىم سالىنعان زاتتاردى وتكىزۋگە تىرىسقانى ءۇشىن 30 تالاپكەر تەستىلەۋ مۇمكىندىگىنەن ايىرىلدى. تەستىلەۋ كەزىندە ەرەجە بۇزعانى ءۇشىن اۋديتوريادان 36 ادام شىعارىلدى. جالعان ادامدار انىقتالعان جوق»، – دەلىنگەن حابارلامادا.
ۇبت-2026 اياقتالعاننان كەيىن بەينەجازبالارعا تالداۋ كۇنتىزبەلىك جىلدىڭ 31 قازانىنا دەيىن جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجە بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
«كوللەدج تۇلەكتەرى ءوز ماماندىعى بويىنشا جوعارى وقۋ ورنىندا اقىلى نەگىزدە وقۋدى جالعاستىرۋدى جوسپارلاسا، اڭگىمەلەسۋ ناتيجەلەرى بويىنشا تۇسە الادى. بۇل جاعدايدا قابىلداۋدى جوعارى وقۋ ورىندارىنىڭ قابىلداۋ كوميسسيالارى جۇزەگە اسىرادى»، – دەپ حابارلادى مينيسترلىكتە.