تايلاندتىڭ پاتتاييا قالاسىندا 17 جاستاعى ءجاسوسپىرىمدى ءولتىرىپ، دەنەسىن چەمودانعا سالىپ تاستادى دەپ ايىپتالعان 45 جاستاعى اۆستراليالىق ازامات سايمون پيتەر كارمان سوتتا وزىنە تاعىلعان ايىپتاردى مويىندامادى. بۇل تۋرالى پاتتاييا پروۆينسيالىق سوتىنىڭ وكىلى مالىمدەدى، دەپ حابارلايدى infohub.kz سايتى.
كارمان ماۋسىم ايىندا تۇتقىندالعان بولاتىن. وعان دەيىن بانگكوكتان وڭتۇستىك-شىعىسقا قاراي شامامەن 150 شاقىرىم جەردە ورنالاسقان پاتتاييا قالاسىندا تۇراتىن تۋنچانوك دونحوملا ەسىمدى 17 جاستاعى قىزدىڭ جوعالىپ كەتكەنى حابارلانعان. كوپ ۇزاماي ونىڭ دەنەسى سالىنعان چەمودان تابىلدى. پوليسيانىڭ مالىمەتىنشە، قىز تۇنشىعۋدان قازا تاپقان.
سوت وكىلىنىڭ ايتۋىنشا، كارمان جۇما كۇنى پاتتاييا پروۆينسيالىق سوتىنا كەلگەن. وندا ول بارلىق ايىپتار بويىنشا ءوز كىناسىن مويىندامادى. وعان ادام ءولتىرۋ، ءمايىتتى جاسىرۋ جانە كامەلەتكە تولماعان قىزدى ازعىندىق ماقساتتا الىپ كەتۋ ايىپتارى تاعىلعان. سوتتىڭ كەلەسى وتىرىسى 12 قازانعا بەلگىلەندى.
بۇعان دەيىن پوليسيا بەينەباقىلاۋ كامەرالارىنىڭ جازبالارىندا كارماننىڭ 25 ماۋسىم كۇنى تاڭەرتەڭگى ۋاقىتتا پاتتايياداعى تۇرعىن ءۇي كەشەنىنە قىزبەن بىرگە كىرىپ، سول كۇنى كەشكە ۇلكەن قارا چەموداندى كوتەرىپ شىققانىن كورسەتەتىنىن مالىمدەگەن ەدى.
تايلاند بۇقارالىق اقپارات قۇرالدارى ينتەرنەتتە جاريالاعان پوليسيا تەرگەۋىنىڭ بەينەجازباسىندا كارمان قىز وعان پىشاقپەن قورقىتقاندىقتان، ءوزىن-وزى قورعاۋ ماقساتىندا ارەكەت ەتكەنىن ايتقان.
بۇل وقيعا پاتتاييا قالاسىن ەل نازارىنا قايتا شىعاردى. قالا شەتەلدىك تۋريستەر اراسىندا جاعاجايلارىمەن جانە تۇنگى ومىرىمەن تانىمال، الايدا سونىمەن قاتار سەكس-تۋريزممەن بايلانىستى بەدەلىمەن دە بەلگىلى.