تايلاند پرەمەر-مينيسترى انۋتحين چانۆيراكۋن رەسەيلىك نازيموۆتاردىڭ قاتىگەزدىكپەن ءولتىرىلۋىن ەل ءۇشىن «ۇلكەن ۇيات» دەپ اتادى، دەپ حابارلايدى infohub.kz.
ۇكىمەت باسشىسىنىڭ ايتۋىنشا، شەتەلدىكتەرگە قاتىستى اۋىر قىلمىستاردىڭ قۇربانى كوبىنەسە تۋريستەر ەمەس، ەكسپاتتار بولادى. 17 جاستاعى رومان مەن 22 جاستاعى ديانا نازيموۆتاردى اسا قاتىگەزدىكپەن ءولتىردى دەگەن كۇدىكپەن تايلاندتىڭ ەكى ازاماتى ۇستالعاننان كەيىن، شەنەۋنىك سەنبى كۇنى وسى ءىستىڭ تەرگەۋىنە بايلانىستى پاتتايياعا باردى.
«جاس رەسەيلىكتەردىڭ ءولتىرىلۋى تايلار تاراپىنان جاسالعاندىقتان، بۇل — قاسىرەت قانا ەمەس، تايلاند ءۇشىن ۇلكەن ۇيات. ءبىز مۇنى تۇسىنەمىز. ەكى جاعدايدا دا تەرگەۋ مەن سوت وسى قىلمىستارعا اكەلگەن سەبەپتەردى مۇقيات انىقتاپ، بولاشاقتا مۇنداي قاسىرەتتىڭ قايتالانباۋىن قامتاماسىز ەتەدى»، — دەدى پرەمەر-مينيستر.
ول شەتەلدىكتەرگە قاتىستى اۋىر قىلمىستار تايلاند ءۇشىن وتە سيرەك ەكەنىن، ال تالداۋ كورسەتكەندەي، كوپ جاعدايدا قۇرباندار ەلدە جىلدار بويى تۇراتىن ەكسپاتتار بولاتىنىن، تۋريستەر ەمەس ەكەنىن اتاپ ءوتتى.
«سەبەبى، ەكسپاتتار تۋريستەرگە ارنالعان ءقاۋىپسىز ايماقتاردان تىس جەرلەردە تۇرىپ، تاماقتانىپ، دەمالادى. ال بۇل ايماقتاردا شەتەلدىكتەردىڭ قاۋىپسىزدىگى مەن قۇقىق قورعاۋ ورگاندارىنىڭ جۇمىسى ءارقاشان جوعارى دەڭگەيدە، ءومىر ىرعاعى قىسقا دەمالىسقا ساي كەلەدى»، — دەپ ءتۇسىندىردى چانۆيراكۋن.
ەسكە سالايىق، رەسەيلىكتەر 26 شىلدە كۇنى تاڭەرتەڭ حابار-وشارسىز جوعالعان، كەيىن ولاردىڭ Honda ADV 150 موتوسيكلى چونبۋري پروۆينسياسىنداعى ەسكى زيرات ماڭىندا بولشەكتەلىپ، كومىلگەن كۇيىندە تابىلعان.
كەيىن ەكى كۇدىكتى ۇستالىپ، ولار 22 جاستاعى ديانا نازيموۆا مەن ونىڭ 17 جاستاعى ءىنىسى روماندى ولتىرگەندەرىن مويىندادى. ولاردىڭ ايتۋىنشا، موتوسيكلدى ۇرلاماق بولعان، الايدا جاسوسپىرىمدەر قارسىلىق كورسەتكەندە، ءىنىسىن اتىپ ءولتىرىپ، اپكەسىن ۇرىپ ولتىرگەن.
سونداي-اق كۇدىكتىلەر دەنەلەردىڭ جەرلەنگەن جەرىن كورسەتتى. رەسەيلىكتەردىڭ قاسىنان ءۇش ءولى تاي تابىلدى: ەر ادام، ايەل جانە قىز بالا.
كوپ ۇزاماي تايلاندتاعى پوليسيا بولىمشەسىنىڭ الدىنا جينالعان توبىر رەسەيلىك اعا-قارىنداستى جانە جەرگىلىكتى وتباسىن ءولتىردى دەگەن كۇدىكتىلەرگە ءولىم جازاسىن تاعايىنداۋدى تالاپ ەتتى.