تايلاند پرەمەر-مينيسترى ءارى ىشكى ىستەر ءمينيسترى انۋتحين چانۆيراكۋن كورولدىكتە ۇزاق ۋاقىت تۇرىپ جاتقان شەتەلدىكتەرگە قاتاڭ ەسكەرتۋ جاسادى. ول ولاردى جەرگىلىكتى بيلىكتى پايدالانباۋعا جانە ولەتىن بولسا، وتانىنا بارىپ ولۋگە شاقىردى، دەپ حابارلايدى infohub.kz سايتى.
NUR.KZء-تىڭ ريا نوۆوستيگە سىلتەمە جاساپ حابارلاۋىنشا، ۇكىمەت باسشىسى بۇل كەڭەستى تايلاند پروۆينسيالارىنىڭ گۋبەرناتورلارىمەن وتكەن جينالىستا ايتقان. جەرگىلىكتى Nation اگەنتتىگىنىڭ دەرەگىنشە، قاتاڭ رەاكسياعا شەتەلدىكتەردىڭ جەكە زيرات سالۋ تۋرالى ءوتىنىشى سەبەپ بولعان.
«جاقىندا (شەتەلدىكتەر تاراپىنان — رەد. ەسكەرتپەسى) جەكە زيرات سالۋ تۋرالى ءوتىنىش تۇسكەنىن ءبىلدىم. بۇل تىم اسىپ كەتتى، شەكتەن شىققاندىق. سەندەردى وسىندا كەلۋگە رۇقسات ەتكەنىمىزگە العىس ايتۋلارىڭ كەرەك. ادال ەڭبەك ەتىپ، كۇنكورىس تابۋ ءۇشىن كەلۋگە. ەگەر ولەتىن بولساڭدار — وتانىڭا بارىپ ولىڭدەر. مۇندا ءولۋدىڭ قاجەتى جوق. ءبىزدى پايدالانۋعا تىرىسپاڭدار»، — دەدى چانۆيراكۋن.
پرەمەر شەتەلدىكتەر بيلىكتىڭ رۇقساتىنسىز ءوز بەتىنشە تايلاند اۋماعىندا ءدىني مەكەمەلەر مەن قاۋىمداستىقتار قۇرماۋى ءتيىس ەكەنىن دە قوستى. اسىرەسە «مەيرامحانا ليسەنزياسىن الىپ، ونىڭ ورنىنا عيبادات ءۇيىن اشۋعا» جول بەرىلمەيدى.
ول ءوز پروۆينسيالارىندا شەتەلدىكتەردىڭ قۇقىققا قايشى ارەكەتتەرىن، سونداي-اق ولاردىڭ تايلاند داستۇرلەرى مەن حالقىنا قۇرمەتسىزدىك تانىتۋ جاعدايلارىن قاتاڭ تۇردە توقتاتۋدى تاپسىردى.
«تايلاند شەتەلدىكتەردى قابىلداۋعا دايىن، ءبىراق ىنتىماقتاستىق ءوزارا ءتيىمدى بولۋى كەرەك. تۋريزم ەلگە قارجى مەن ينۆەستيسيا اكەلەدى، ءبىراق بۇل ەشكىمگە باسقالاردى پايدالانۋعا نەمەسە ينۆەستيسيانى زاڭسىز ءىس ءۇشىن جۇمساۋعا قۇقىق بەرمەيدى»، — دەدى پرەمەر. ول مۇنداي زاڭسىز ىسكە ەل اۋماعىندا بيزنەس ۇيىمداستىرۋ كەزىندە تايلاند ازاماتتارىن جالعان يەلەر رەتىندە پايدالانۋ دا جاتاتىنىن ءتۇسىندىردى.
ول ءسوز ءبىر ايماقتان عانا ەمەس، ازيا، تاياۋ شىعىس، ورتالىق ازيا، ەۋروپا جانە افريكا مەملەكەتتەرىنەن كەلگەن ءتۇرلى ەلدىڭ شىققاندارى تۋرالى بولىپ وتىرعانىن قوستى.
باسىلىمنىڭ اتاپ وتۋىنشە، وسى اپتانىڭ باسىندا تايلاند بيلىگىنىڭ بۇيرىعىمەن ەكى جىل بۇرىن سالىنعان جەكە ەۆرەي زيراتى جويىلعان. جەرگىلىكتى اكىمشىلىك ونىڭ زيرات ليسەنزياسىن ۇزارتپاعان. تايلاند تۇرعىندارىنىڭ كوپشىلىگى ءبۋدديزمدى ۇستاناتىندىقتان، ونىڭ ءداستۇرى بويىنشا مارقۇمداردىڭ دەنەسى ورتەلەدى، سوندىقتان ەلدە زيرات وتە از. بار زيراتتاردىڭ كوبىسى مۇسىلماندار مەن قىتايلاردىكى. سونداي-اق كورولدىكتە بىرنەشە رەسمي حريستيان زيراتى بار، ونىڭ ىشىندە كاتوليك جانە پروتەستانت زيراتتارى، سونداي-اق پراۆوسلاۆيە ءموناستىرى جانىنداعى ءبىر ورىس پراۆوسلاۆيە زيراتى بار.