پاتتايياداعى ەكى جاس رەسەيلىكتىڭ ءولتىرىلۋى تايلاندتىڭ تۋريستىك يميدجىنە نۇقسان كەلتىرەدى، دەپ مالىمدەدى ەلدىڭ سىرتقى ىستەر ءمينيسترى، دەپ حابارلايدى infohub.kz.
تايلاندتىڭ سىرتقى ىستەر ءمينيسترى سيحاساك پحۋانگكەتكەو پاتتايياداعى ەكى جاس رەسەيلىكتىڭ ءولتىرىلۋى ەلدىڭ تانىمال تۋريستىك باعىت رەتىندەگى بەدەلىنە تەرىس اسەر ەتەتىنىن ايتتى.
«تايلاند — ءىرى تۋريستىك باعىت. مۇنداي قىلمىس بولعان كەزدە بۇل تۋريستەردىڭ سەنىمىنە نۇقسان كەلتىرەدى. ءبىز مۇنى مويىنداۋىمىز كەرەك»، — دەدى سىرتقى ساياسي ۆەدومستۆو باسشىسى بانگكوكتاعى بريفينگتە.
ونىڭ ايتۋىنشا، بيلىك تەك مالىمدەمەمەن شەكتەلمەي، ءوز ۇستانىمىن ناقتى قادامدارمەن راستاۋدى كوزدەپ وتىر.
«ءبىز ناقتى ارەكەتتەرمەن قاۋىپسىزدىكتى ارتتىرۋعا جانە بولاشاقتا مۇنداي قىلمىستىڭ قايتالانباۋىنا جول بەرمەۋگە بەل بۋعانىمىزدى كورسەتۋىمىز كەرەك»، — دەپ اتاپ ءوتتى مينيستر.
ەسكە سالايىق، رەسەيلىكتەر 26 شىلدە كۇنى تاڭەرتەڭ حابارسىز كەتكەن بولاتىن، كەيىن ولاردىڭ Honda ADV 150 موتوسيكلى چونبۋري پروۆينسياسىنداعى ەسكى زيرات ماڭىندا بولشەكتەلىپ، كومىلگەن كۇيىندە تابىلدى.
كەيىن ەكى كۇدىكتى ۇستالىپ، ولار 22 جاستاعى ديانا نازيموۆا مەن ونىڭ 17 جاستاعى اعاسى روماندى ولتىرگەندەرىن مويىندادى. ولاردىڭ ايتۋىنشا، موتوسيكلدى ۇرلاماق بولعان، الايدا جاس جىگىت قارسىلىق كورسەتكەندە، ولار كىشى اعاسىن اتىپ ءولتىرىپ، سودان كەيىن ۇلكەن اپكەسىن ۇرىپ ولتىرگەن.
سونداي-اق كۇدىكتىلەر دەنەلەردىڭ جەرلەنگەن جەرىن كورسەتتى. رەسەيلىكتەردىڭ قاسىنان ءۇش ءولى تايلاندتىق تابىلدى: ەر ادام، ايەل جانە قىز بالا.
كوپ ۇزاماي تايلاندتاعى پوليسيا بولىمشەسىنىڭ الدىنا جينالعان توبىر رەسەيلىك اعا-قارىنداستى جانە جەرگىلىكتى وتباسىن ءولتىردى دەپ كۇدىكتەلگەندەرگە ءولىم جازاسىن تاعايىنداۋدى تالاپ ەتتى.