تايلاند ۇكىمەتى شەتەل ازاماتتارىنا قاتىستى كوشى-قون ەرەجەلەرىن قايتا قارادى: 2026 جىلعى 15 قىركۇيەكتەن باستاپ قازاقستاننان كەلگەن تۋريستەرگە ۆيزاسىز جۇرۋگە رۇقسات ەتىلگەن مەرزىم ەكى ەسەگە — 60 كۇننەن 30 كۇنگە قىسقارادى. بۇل تۋرالى قازاقستاننىڭ تايلاندتاعى ەلشىلىگى حابارلادى، دەپ جازادى infohub.kz سايتى.
تايلاند مينيسترلەر كابينەتىنىڭ بۇل شەشىمى بۇرىن قولدانىستا بولعان جەڭىلدىكتىڭ كۇشىن جويىپ، ەكىجاقتى ۇكىمەتارالىق كەلىسىمنىڭ قاتاڭ تالاپتارىنا قايتا ورالۋدى بىلدىرەدى. نەگىزگى قۇجاتقا سايكەس، قازاقستاندىق ۇلتتىق پاسپورت يەلەرى كورولدىك اۋماعىندا ۆيزا راسىمدەمەي-اق كىرگەن ساتتەن باستاپ 30 كۇننەن اسپايتىن ۋاقىت بولا الادى.
سونىمەن قاتار قايتالاپ بارۋدىڭ جيىلىگى مەن ۇزاقتىعىنا قاتىستى شەكتەۋ دە جاڭارتىلىپ وتىر. شەتەلدىكتىڭ ەلدە بولۋىنىڭ جالپى مەرزىمى كەز كەلگەن 180 كۇندىك كەزەڭ ىشىندە 90 كۇنتىزبەلىك كۇننەن اسپاۋعا ءتيىس. بۇل شارا زاڭسىز ەڭبەك كوشى-قونىنىڭ الدىن الۋعا جانە «ۆيزا-ران» دەپ اتالاتىن — شەكارادان شىعىپ قايتا كىرىپ، بولۋ مەرزىمىن نولدەۋ تاجىريبەسىنە جول بەرمەۋگە باعىتتالعان.
قازاقستاننىڭ تايلاندتاعى ەلشىلىگى ازاماتتارعا دەمالىس، قاشىقتان جۇمىس نەمەسە قىستاۋ جوسپارىن قۇرعاندا كوشى-قون زاڭناماسىنداعى وزگەرىستەردى ەسكەرۋدى ۇسىنادى.
ەگەر جوسپارلانعان بولۋ مەرزىمى بەلگىلەنگەن 30 كۇندىك شەكتەن اسىپ كەتسە، قازاقستاندىقتار ءتيىستى تۋريستىك نەمەسە ۇزاق مەرزىمدى ۆيزانى تايلاندتىڭ رەسمي ديپلوماتيالىق وكىلدىكتەرى ارقىلى الدىن الا راسىمدەۋى قاجەت.
بۇعان دەيىن، 2026 جىلعى ءۇشىنشى تامىزدا تايلاند بيلىگى شەتەلدىك ساياحاتشىلاردىڭ قاۋىپسىزدىگىن ايتارلىقتاي كۇشەيتۋگە ۋادە بەرگەن ەدى. بۇل مالىمدەمە رەسەيلىك ازاماتتاردىڭ قازا تابۋىنا اكەلگەن رەزونانستىق قايعىلى وقيعادان كەيىن جاسالىپ، تايلاند ۇكىمەتىن ەلدىڭ نەگىزگى كۋرورتتارىنداعى قاۋىپسىزدىك ستاندارتتارى مەن حاتتامالارىن جەدەل قايتا قاراۋعا ماجبۇرلەدى.