وسكەمەندە تاكسي جۇرگىزۋشىسى قارت ايەلگە قاتىستى ءىرى الاياقتىقتىڭ الدىن الدى، دەپ حابارلايدى infohub.kz سايتى.
شىعىس قازاقستان وبلىسى پوليسيا دەپارتامەنتىنىڭ باستىعى، پوليسيا گەنەرال-مايورى ەرلان وماربەكوۆ تورەجان ادابيەتوۆ ەسىمدى تاكسيستپەن كەزدەستى. ول ءوزىنىڭ سەرگەكتىگى مەن جاناشىرلىعىنىڭ ارقاسىندا تەلەفون الاياقتارىنىڭ زەينەتكەردىڭ 1،5 ميلليون تەڭگەدەن استام اقشاسىن جىمقىرۋىنا جول بەرمەدى.
اۆتوكولىك سالونىندا تۇسىرىلگەن ۆيدەو الەۋمەتتىك جەلىلەردە تارادى. كادرلاردا جۇرگىزۋشى ارتقى ورىندىقتا وتىرعان ايەلگە: «كودتى سۇراسا، ايتپاڭىز، بۇلار الاياق بولۋى مۇمكىن»، — دەپ ۇندەۋ تاستايدى. سودان كەيىن تاكسيست زەينەتكەردىڭ تەلەفونىن الىپ، قىلمىسكەرلەرمەن ءوزى سويلەسەدى: «اللو، مامۋل؟ ءيا، اعا. — بۇل ءسىزدىڭ اناڭىز با؟ — ءيا، نە بولدى؟ — ءسىز ونى الداعىڭىز كەلدى مە، اقشاعا؟»
ەرلان وماربەكوۆ تورەجانعا باتىل ارەكەتى، بەلسەندى ازاماتتىق ۇستانىمى جانە قىلمىستىڭ الدىن الۋعا قوسقان جەكە ۇلەسى ءۇشىن شىن جۇرەكتەن العىس ءبىلدىردى. ول ءدال وسىنداي ادامدار پوليسياعا الاياقتىققا قارسى كۇرەستە ناعىز كومەكشى بولاتىنىن جانە اينالاسىنداعىلارعا ۇلگى بولاتىنىن اتاپ ءوتتى.
«بۇگىندە الاياقتار زاماناۋي تەحنولوگيالار مەن پسيحولوگيالىق اسەر ەتۋ ادىستەرىن ءجيى قولدانادى، سوندىقتان ءبىزدىڭ ورتاق مىندەتىمىز — مۇنداي قىلمىستاردى اشۋ عانا ەمەس، ولاردىڭ الدىن الۋ. تەك پوليسيانىڭ، قوعامنىڭ جانە ءاربىر سانالى ازاماتتىڭ كۇشىن بىرىكتىرە وتىرىپ، ءبىز قىلمىسقا ءتيىمدى قارسى تۇرىپ، جەرلەستەرىمىزدى قورعاي الامىز»، — دەدى شقو پد باستىعى.