تالدىقورعاندا باعدارلامالاۋ مەن جاساندى ينتەللەكتتى تەگىن وقىتاتىن Tomorrow School مەكتەبىنىڭ العاشقى وڭىرلىك كامپۋسى جۇمىسىن باستادى. مۇندا 2026 جىلدىڭ سوڭىنا دەيىن 1،5 مىڭ ادامدى وقىتۋ جوسپارلانۋدا، دەپ حابارلايدى infohub.kz سايتى.
كامپۋس وبلىستىق سيفرلىق تەحنولوگيالار باسقارماسى مەن Jetisu Digital IT-حابىنىڭ قولداۋىمەن «جەتىسۋ جاستارى» ورتالىعىنىڭ بازاسىندا اشىلدى. وقۋ ءۇشىن قاجەتتى باعدارلامالىق قامتاماسىز ەتىلگەن 50 كومپيۋتەر دايىندالدى. مەكتەپ تاۋلىك بويى ءتورت اۋىسىممەن جۇمىس ىستەيدى، ساباقتار 28 قىركۇيەكتە باستالادى.
وبلىستىق سيفرلىق تەحنولوگيالار باسقارماسىنىڭ باسشىسى ايدىن تەمىرباەۆتىڭ ايتۋىنشا، وقۋعا 15 جاستان اسقان ادامدار قاتىسا الادى. ارنايى ءبىلىم نەمەسە IT سالاسىندا تاجىريبە قاجەت ەمەس.
«بۇل — 15 جاستان اسقان قاتىسۋشىلار ءۇشىن باعدارلامالاۋ مەن جاساندى ينتەللەكت بويىنشا تەگىن پراكتيكالىق وقۋدان وتۋگە ۇلكەن مۇمكىندىك. مەكتەپ تاۋلىك بويى ءتورت اۋىسىممەن جۇمىس ىستەيدى. ساباقتار 28 قىركۇيەكتە باستالادى»، — دەدى تەمىربايەۆ.
Tomorrow School-عا ءتۇسۋ ءۇشىن جوبانىڭ سايتىندا تىركەلىپ، كامپۋستى تاڭداپ، ءوتىنىم تولتىرىپ، ەستە ساقتاۋ جانە لوگيكاعا ارنالعان ەكى ونلاين-ويىننان ءوتۋ قاجەت. ءساتتى ۇمىتكەرلەر ءتورت اپتالىق ينتەنسيۆكە شاقىرىلادى.
ينتەنسيۆتى كۋرستان كەيىن ۇزدىك قاتىسۋشىلار 18 ايعا سوزىلاتىن نەگىزگى باعدارلاماعا وتە الادى. وقۋ كۇندىزگى فورماتتا، ءداستۇرلى دارىستەر مەن وقىتۋشىلارسىز وتەدى: ستۋدەنتتەر ماتەريالداردى ءوز بەتىنشە وقيدى، كوماندالاردا جۇمىس ىستەيدى، ءبىر-بىرىنىڭ تاپسىرمالارىن تەكسەرەدى جانە باعدارلامالاۋ مەن جاساندى ينتەللەكت بويىنشا 50-دەن استام پراكتيكالىق جوبانى ورىندايدى.
Tomorrow School جەتەكشىسى ايگەرىم شايمەردەنوۆا ءتۇسۋ ءۇشىن الدىن الا باعدارلامالاۋ تاجىريبەسى قاجەت ەمەس ەكەنىن اتاپ ءوتتى.
Tomorrow School مەكتەبى 2024 جىلى Astana Hub بازاسىندا قۇرىلعان، ءقازىر جوبا قازاقستاننىڭ وڭىرلەرىندە كەڭەيتىلۋدە.