تالدىقورعاندا 14 جاسار قىز ءتورت مەتردەي تەرەڭدىكتەگى اشىق قۇدىققا قۇلاپ كەتتى. پوليسەيلەردىڭ جەدەل ارەكەتىنىڭ ارقاسىندا بالانى قۇتقارىپ قالدى، دەپ حابارلايدى infohub.kz سايتى.
پوليسياعا كامەلەتكە تولماعان قىزدىڭ اشىق قۇدىققا قۇلاعانى تۋرالى حابار ءتۇستى. وقيعا ورنىنا پاترۋلدىك پوليسيا روتاسىنىڭ قىزمەتكەرلەرى، «بەركۋت-163» جانە «بەركۋت-164» ەكيپاجدارى دەرەۋ جەتتى.
زارداپ شەككەن قىزدىڭ 12 جاسار ءسىڭلىسى ولاردىڭ مىسىقتىڭ ارتىنان جۇگىرگەنىن ايتتى. ءبىر ساتتە 14 جاسار قىز اشىق قۇدىقتى بايقاماي، ىشىنە قۇلاپ كەتكەن. قۇدىقتىڭ تەرەڭدىگى شامامەن ءتورت مەتر بولعان.
«ءبىر مينۋتتاي ۋاقىت جوعالتپاي، پوليسەيلەر بالانى جۇباتتى، ارقان ءتۇسىرىپ، ونىمەن ۇنەمى بايلانىستا بولىپ، جەر بەتىنە شىعۋىنا كومەكتەستى. پوليسيا قىزمەتكەرلەرى اسقاربەك ا.، بازاربايەۆ د.، جامانايەۆ ا.، نارىكبايەۆ د. جانە مىرزاحمەتوۆ د.-تىڭ كاسىبي جانە ۇيلەسىمدى ىس-ارەكەتتەرىنىڭ ارقاسىندا بالانى قۇتقارىپ قالدى. قىزدى دارىگەرلەرگە تاپسىرىپ، قاجەتتى كومەك كورسەتىلدى»، — دەپ حابارلادى وڭىرلىك پوليسيا دەپارتامەنتى.
ۋچاسكەلىك پوليسيا ينسپەكتورلارى ءقاۋىپتى قۇدىقتى جابۋ جانە جاۋاپتى تۇلعالارعا قاتىستى شارا قولدانۋ تۋرالى نۇسقاما ەنگىزگەنى اتاپ ءوتىلدى.
سونداي-اق كامەلەتكە تولماعانداردىڭ اتا-انالارىمەن بالالاردىڭ تۇنگى ۋاقىتتا ەرەسەكتەردىڭ قاراۋىنسىز جۇرۋىنە جول بەرمەۋ جانە ولاردىڭ قاۋىپسىزدىگىن باقىلاۋدى كۇشەيتۋ قاجەتتىگى تۋرالى پروفيلاكتيكالىق اڭگىمە جۇرگىزىلدى.