تالدىقورعاندا جاستار جولدىڭ وزىندە ءقاۋىپتى قىلىقتار جاسادى: قوزعالىپ كەلە جاتقان كولىك تەرەزەسىنەن شىعىپ، مەملەكەتتىك تىركەۋ ءنومىرى جوق كۇيدە ءجۇردى، ال بىرەۋى قوعامدىق ورىندا دارەت سىندىردى. بارلىق بۇزۋشىلىق جەدەل باسقارۋ ورتالىعىنىڭ كامەرالارىنا ءتۇسىپ قالدى، دەپ حابارلايدى infohub.kz سايتى.
جەتىسۋ وبلىسى پوليسيا دەپارتامەنتىنىڭ مالىمەتىنشە، وقيعا تالدىقورعاندا بولعان. ۆەدومستۆو بولعان جايدى «ەرەجەسىز ءجۇرىس» دەپ سيپاتتادى. بەينەباقىلاۋ كامەرالارى جاستار جىبەرگەن بىرنەشە بۇزۋشىلىقتى بىردەن تىركەپ الدى.
«كادرلاردا كولىك قوزعالىپ كەلە جاتقاندا جولاۋشىلاردىڭ ءبىرى قاۋىپسىزدىك تالاپتارىن ەلەمەي، تەرەزەدەن شىعىپ تۇرعانى كورىنەدى. سودان كەيىن كولىك توقتاپ، ودان مەملەكەتتىك تىركەۋ ءنومىرى الىنادى دا، ول ءنومىرسىز ءجۇرىسىن جالعاستىرادى. كەيىنىرەك جولاۋشىلاردىڭ ءبىرى، 22 جاستاعى جاس جىگىت، قوعامدىق ورىندا دارەت سىندىرىپ، ۇساق بۇزاقىلىق جاسادى»، — دەدى پوليسيا دەپارتامەنتىندە.
پوليسيا قىزمەتكەرلەرى وقيعاعا قاتىسقانداردىڭ بارلىعىن انىقتادى. 19 جاستاعى جۇرگىزۋشى جىبەرگەن بۇزۋشىلىقتارى ءۇشىن اكىمشىلىك جاۋاپكەرشىلىككە تارتىلدى. 22 جاستاعى جولاۋشىعا قاتىستى ۇساق بۇزاقىلىق فاكتىسى بويىنشا ماتەريالدار سوتقا جىبەرىلدى.