تالدىقورعاندا پوليسيا قىزمەتكەرلەرى ەر ادامدى ۇستادى. ونىڭ ايەلى شابۋىل جاسالعانى تۋرالى ارىزدانعان. ۇستالعان ادامنىڭ قارۋى تاركىلەندى، دەپ حابارلايدى infohub.kz سايتى.
جەتىسۋ وبلىسى پوليسيا دەپارتامەنتىنىڭ مالىمەتىنشە، 2 قازاندا تالدىقورعان تۇرعىنى پوليسياعا كەلىپ، كۇيەۋىنىڭ دەنەسىنە جاراقات سالىپ، قورقىتقانىن ايتقان.
«وقيعا ورنىنا دەرەۋ پوليسيا قىزمەتكەرلەرى كەلىپ، ەر ادامدى ۇستادى. ودان پنەۆماتيكالىق قارۋ تاركىلەندى»، — دەدى قۇقىق قورعاۋ ورگاندارى.
دەنە جاراقاتىن سالۋ جانە قورقىتۋ فاكتىسى بويىنشا قىلمىستىق ءىس قوزعالدى. كۇدىكتى ۋاقىتشا وقشاۋلاعىشقا قامالدى.
«دارىگەرلەر تەكسەرگەننەن كەيىن ايەل مەن ونىڭ بالاسى داعدارىس ورتالىعىنا ورنالاستىرىلىپ، قاجەتتى كومەك كورسەتىلدى. بۇعان دەيىن ايەل پوليسياعا شاعىمدانباعان»، — دەدى پوليسيا دەپارتامەنتىندە.
پوليسيا جاريالاعان بەينەجازبادا جارتىلاي جالاڭاش ەر ادام جەكە ءۇيدىڭ اۋلاسىندا ايەلدى قۋالاپ جۇرگەنىن بايقاۋعا بولادى.