كاسپي تەڭىزىندە ءوزىنىڭ ەكى تانكەرىمەن شيكى مۇناي تاسىمالدايتىن جەكەمەنشىك Caspian Integrated Maritime Solutions Ltd. كومپانياسىنىڭ باس ديرەكتورى شەرحان سۇگىربەكوۆ 2025 جىلى 86،464 ملن تەڭگە سىياقى الدى. كومپانيانىڭ قارجىلىق ەسەپتىلىگىنە سايكەس، بۇل ايىنا ورتا ەسەپپەن 7،2 ملن تەڭگەنى قۇرايدى، دەپ حابارلايدى infohub.kz سايتى.
«2025 جىلعى 31 جەلتوقسانداعى جاعداي بويىنشا نەگىزگى باسقارۋشى پەرسونال 1 ادامنان تۇردى (2024 جىلعى 31 جەلتوقساندا: 1 ادام). 2025 جىلعى 31 جەلتوقساندا اياقتالعان كەزەڭدە نەگىزگى باسقارۋشى پەرسونالعا تولەنگەن، قوسا بەرىلگەن جيىنتىق كىرىس تۋرالى ەسەپتە جالپى جانە اكىمشىلىك شىعىستارعا ەنگىزىلگەن سىياقىنىڭ جالپى سوماسى 86 464 مىڭ تەڭگەنى قۇرادى (2024 جىلعى 31 جەلتوقساندا اياقتالعان كەزەڭدە: 68 117 مىڭ تەڭگە)»، – دەلىنگەن قۇجاتتا.
2024–2025 جىلدارى نەگىزگى باسقارۋشى پەرسونالعا بەرىلەتىن سىياقى نەگىزىنەن جالاقىدان تۇردى، دەپ اتاپ وتىلگەن ەسەپتىلىكتە.
2025 جىلدىڭ قورىتىندىسى بويىنشا جەكەمەنشىك Caspian Integrated Maritime Solutions Ltd. كومپانياسى 1،1 ملرد تەڭگە پايدا تاپتى، ال 2024 جىلى بۇل كورسەتكىش 916 ملن تەڭگە بولاتىن. كومپانيانىڭ 2025 جىلعى ءتۇسىمى 5،9 ملرد تەڭگەنى قۇرادى، 2024 جىلى 5،2 ملن تەڭگە ەدى. ءتۇسىمنىڭ بارلىعى كاسپي تەڭىزىندە شيكى مۇناي تاسىمالداۋدان ءتۇستى – 2024–2025 جىلدارى نەگىزگى كليەنت «قازمۇنايگاز» قۇرامىنا كىرەتىن «قازمورترانسفلوت» ۇلتتىق تەڭىز كەمە قاتىناسى كومپانياسى بولدى.
كومپانيانىڭ 2025 جىلدىڭ سوڭىنداعى بولىنبەگەن پايداسى 1،2 ملرد تەڭگەنى قۇرادى. Caspian Integrated Maritime Solutions Ltd. 2025 جىلى 1 ملرد تەڭگە ديۆيدەند تولەدى.
Caspian Integrated Maritime Solutions Ltd. تەڭىز ارقىلى جۇك تاسىمالداۋمەن اينالىسادى. ونىڭ فلوتىندا كومپانيا 2023 جىلى ساتىپ العان Taraz جانە Liwa جەكەمەنشىك مۇناي تانكەرلەرى بار. كومپانيانىڭ سايتىندا Taraz جانە Liwa تانكەرلەرىنىڭ ءارقايسىسىنىڭ جالپى سىيىمدىلىعى 5122 توننا ەكەنى كورسەتىلگەن. كومپانيانىڭ كولىك قۇرالدارىنىڭ 2025 جىلدىڭ سوڭىنداعى جيىنتىق بالانستىق قۇنى 13،6 ملرد تەڭگەنى قۇرادى.
Caspian Integrated Maritime Solutions Ltd. كومپانياسىنىڭ 51%-ى International Maritime Investments Ltd. (ءباا) كومپانياسىنا، 49%-ى «قازمۇنايگاز» قۇرامىنا كىرەتىن «قازمورترانسفلوت» ۇلتتىق تەڭىز كەمە قاتىناسى كومپانياسىنا تيەسىلى.
International Maritime Investments Ltd. تولىعىمەن Abu Dhabi Ports Company PJSC كومپانياسىنا تيەسىلى، ونىڭ 100% اكسياسى Abu Dhabi Development Holdings Company PJSC (ADDHC PJSC) كومپانياسىنا تيەسىلى. 2025 جىلعى 31 جەلتوقسانداعى جاعداي بويىنشا ADDHC PJSC اكسيالارىنىڭ 75،42%-ى ابۋ-دابي ۇكىمەتىنە، 7،3%-ى Al Seer Marine Supplies & Equipment Company PJSC UAE كومپانياسىنا تيەسىلى.