جاپونيادا ءوتىپ جاتقان 2026 جىلعى XX جازعى ازيا ويىندارىندا قازاقستاننىڭ گرەبنوي سلالوم قۇراماسى كاياك-كروسس سايىسىندا جۇلدەسىز قالدى. جۇما كۇنى ەرلەر مەن ايەلدەر ءبىر-بىر كومپلەكت مەدال ساراپقا سالدى. ەل نامىسىن شەشۋشى فينالعا دەيىن جەتكىزگەن جالعىز سپورتشى — ەكاتەرينا تارانسەۆا. ول شەشۋشى جارىستا ءتورتىنشى ورىنعا تۇراقتاپ، تۋرنيردەگى ەكىنشى جەكە مەدالىنە ءبىر-اق قادام جەتپەي توقتادى، دەپ حابارلايدى infohub.kz سايتى.
ايەلدەر فينالىندا جەڭىستى قىتايلىق چەن لين جەڭىپ الدى، قولانى ونىڭ وتانداسى سيۋي لينسي يەلەندى. كۇمىس جۇڭگو تايبەيىنەن كەلگەن چان چۋحانعا بۇيىردى. تاعى ءبىر قازاقستاندىق اناستاسيا انانەۆا شيرەك فينال ساتىسىندا كۇرەستى اياقتادى.
ەرلەر اراسىندا ەل نامىسىن ۆلاديسلاۆ ريابكو مەن الەكساندر كوروبوۆ قورعادى. ەكەۋى دە شاعىن فينالعا جولداما الىپ، جالپى ەسەپ قورىتىندىسى بويىنشا سايكەسىنشە بەسىنشى جانە سەگىزىنشى ورىندارعا تۇراقتادى. التىن مەن كۇمىستى ەكى جاپوندىق — يۋۋكي تاناكا مەن كادزۋيا اداتي جەڭىپ الدى، ۇزدىك ۇشتىكتى قىتايلىق سيۋان سين تۇيىندەدى.
وسىلايشا، قازاقستاننىڭ گرەبنوي سلالوم قۇراماسى ازيادا-2026-نى ءۇش قولا مەدالمەن اياقتادى. پەدەستالعا تارانسەۆا مەن كوروبوۆ (ەكەۋى دە — بايداركا-جەكەلەي)، سونداي-اق انانەۆا (كانوە-جەكەلەي) كوتەرىلدى.