تارازدا سوت الاياقتىق جولمەن راسىمدەلگەن، سوماسى ميلليون تەڭگەگە جۋىق ميكروكرەديتتى جارامسىز دەپ تانىدى، دەپ حابارلايدى infohub.kz سايتى.

جامبىل وبلىسى سوتتارىنىڭ رەسمي Telegram-ارناسىندا حابارلانعانداي، وبلىستىق سوت اپەللياسيالىق تارتىپپەن ايەلدىڭ ميكروقارجى ۇيىمىنا ميكروكرەديت شارتىن جارامسىز دەپ تانۋ تۋرالى تالاپ ارىزى بويىنشا ازاماتتىق ءىستى قارادى.

2024 جىلدىڭ مامىرىندا تالاپ قويۋشى مەن بانك اراسىندا 999 مىڭ تەڭگەگە ميكروكرەديت شارتى جاسالعان. كەيىن وسى شارت بويىنشا تالاپ ەتۋ قۇقىقتارى ميكروقارجى قوعامىنا (مقق) بەرىلگەن.

ءبىرىنشى ساتىداعى سوت تالاپ قويۋشىنىڭ ءوزى ميكروكرەديت راسىمدەمەگەنىن، ونى الۋعا كەلىسىم بەرمەگەنىن جانە اقشانى پايدالانباعانىن انىقتادى. سوتقا جۇگىنۋگە بۇرىن زاڭدى كۇشىنە ەنگەن تۇرار رىسقۇلوۆ اۋدانى سوتىنىڭ ۇكىمى نەگىز بولدى.

ۇكىمگە سايكەس، الاياقتىق ارەكەتتەر جاساعانى ءۇشىن كىنالى دەپ باسقا ايەل تانىلعان. ول داۋلى ميكروكرەديتتى ءوزى راسىمدەگەنىن مويىندادى. ول تالاپ قويۋشىنىڭ كەلىسىمىنسىز ونىڭ ۇيالى تەلەفونى مەن دەربەس دەرەكتەرىن پايدالانعانىن، ال الىنعان اقشانى ءوز قالاۋىنشا جۇمساعانىن ءتۇسىندىردى.

جاۋاپكەر تالاپتى مويىنداماي، ءوتىنىم ەلەكتروندى تۇردە راسىمدەلگەنىن، قارىز الۋشىنىڭ جەكە باسى بيومەتريالىق سايكەستەندىرۋ ارقىلى راستالعانىن، ال ءبىر رەتتىك كود سەنىمدى تەلەفون نومىرىنەن ەنگىزىلگەنىن كورسەتتى.

سوت بيومەتريا جەكە باستى انىقتاۋعا مۇمكىندىك بەرەتىنىن، ءبىراق ول وزدىگىنەن ازاماتتىڭ مامىلە جاساۋعا ىشكى ەركىن راستامايتىنىن اتاپ ءوتتى. سونىمەن قاتار، سوت تالاپ قويۋشىنىڭ اتىنا بۇعان دەيىن باسقا مقق-لاردا وسىعان ۇقساس تاسىلمەن بىرنەشە ميكروكرەديت راسىمدەلگەنىن ەسكەردى. قۇجاتتاردى قۇقىق قورعاۋ ورگاندارىنا بەرىپ، ايىپتاۋ ۇكىمى شىققاننان كەيىن ولار بويىنشا اقپارات جويىلىپ، بەرەشەك ەسەپتەن شىعارىلعان.

سوت داۋلى شارت ءۇشىنشى تۇلعانىڭ الداۋى مەن سەنىمىن تەرىس پايدالانۋىنىڭ سالدارىنان جاسالدى دەگەن قورىتىندىعا كەلدى.

تاراز قالالىق سوتىنىڭ شەشىمىمەن ميكروكرەديت شارتى جارامسىز دەپ تانىلىپ، جاۋاپكەردەن تالاپ قويۋشىنىڭ پايداسىنا مەملەكەتتىك باج جانە وكىل كومەگىنە جۇمسالعان شىعىستار ءوندىرىلدى. شەشىم ۇيىم تاراپىنان شاعىمدالعان، الايدا جامبىل وبلىستىق سوتىنىڭ ازاماتتىق ىستەر جونىندەگى سوت القاسى شەشىمدى وزگەرىسسىز قالدىردى.

سوت اكتىلەرى زاڭدى كۇشىنە ەندى.