تارازدا قاتتى جەلدىڭ ەكپىنى ىشىندە ەكى بالا وتىرعان ۇرمەلى باتۋتتى اۋاعا كوتەردى. باقىتىنا قاراي، بالالار قورىققانى بولماسا، زارداپ شەككەن جوق، دەپ حابارلايدى infohub.kz.
وقيعا 11 تامىزدا ۇلى دالا شاعىن اۋدانىنداعى № 68/1 ءۇيدىڭ جانىندا بولدى. جەلدىڭ كۇرت كۇشەيۋىنەن اتتراكسيون اۋدارىلىپ، جوعارى كوتەرىلدى، سودان كەيىن بالالار جەرگە قۇلادى. كوزازدەر بولعان وقيعانى ۆيدەوعا ءتۇسىرىپ، الەۋمەتتىك جەلىلەردە تەز تاراتتى. كادرلاردا باتۋتتىڭ قيسايىپ، اۋاعا كوتەرىلگەنى، ەرەسەكتەردىڭ بالالارعا كومەككە ۇمتىلعانى كورىنەدى.
تاراز قالاسى اۋليەاتا اۋدانى اكىمدىگىنىڭ مالىمەتىنشە، وقيعا ورنىنا جەدەل جاردەم بريگاداسى شۇعىل جەتكەن. دارىگەرلەر بالالاردى تەكسەرىپ، دەنساۋلىقتارىنا ەشقانداي زيان كەلمەگەنىن، جاراقات الماعانىن انىقتادى.
بولعان وقيعاعا بايلانىستى اتتراكسيوندى ورناتقان كاسىپكەرگە قاتىستى اكىمشىلىك شارا قولدانىلىپ، وعان ايىپپۇل سالىندى. سونىمەن قاتار، ۋاكىلەتتى بولىمگە اۆتوكولىك تۇراعىنىڭ يەسىنە قاتىستى شارا قولدانۋ تۋرالى ۇسىنىس جىبەرىلدى، ويتكەنى نىسان ماقساتىنا ساي پايدالانىلماعان.