Таразда жол-көлік оқиғасының куәгері өртеніп жатқан көліктің жанындағы адамдарға көмекке ұмтылды, деп хабарлайды infohub.kz сайты.
Тараз тұрғыны 23 қазанға қараған түні болған ЖКО туралы Threads әлеуметтік желісінде @ng_narek лақап атымен әңгімелеп берді. Оның айтуынша, ол өз көлігімен келе жатып, сторис түсіріп жүргенде соқтығысудың куәсі болған. Ер адам көлігін тоқтатып, өртеніп жатқан көліктің жанындағы адамдарға көмектесуге асыққан.
«Өртеніп жатқан көліктің жанындағы адамдарға көмектесу үшін көліктен жүгіріп шықтым. Газдың иісін сезіп, ең алдымен адамдарды шығару керектігін түсіндім, содан кейін жедел жәрдем мен өрт сөндіру қызметін шақырдық», — деді куәгер.
Жамбыл облысы төтенше жағдайлар департаментінде шақырту «112» пультіне 23 қазан күні сағат 02:34-те түскенін мәлімдеді.
«Ағымдағы жылғы 23 қазанда сағат 02:34-те Жамбыл облысы ТЖД-ның “112” пультіне Тараз қаласындағы Бөлтірік шешен және Ұлбике ақын көшелерінің қиылысында ЖКО салдарынан көліктің өртенгені туралы хабарлама түсті. Оқиға орнына ТЖД-ның күштері мен құралдары дереу жетті. Өрт сағат 02:48-де сөндірілді. Қаза тапқандар мен зардап шеккендер жоқ», — делінген ведомство хабарламасында.