تاريحى تەرەڭ تاۋەلسىزدىك!

تاريحى تەرەڭ تاۋەلسىزدىك!

وتسە دە عاسىر، ءبىر كۇننەن اسىپ ءبىر كۇنىڭ،
باستالعان ەكەن ەلدىگىڭ سوناۋ جىل بۇرىن.
ورداڭدى تىكتەپ، شاڭىراق كوتەرگەن كەزىڭدى
550 دەپ بەدەرلەپ جازعان كۇن بۇگىن.

ەسىڭە سالىپ وتكەننىڭ جولىن ەندى كۇن،
ماقتان بوپ سوسىن وياندى بۇگىن ەلدە ۇعىم.
كەرەگە كەرىپ، ۋىعىڭ بەرىك شانشىلىپ،
جاڭعىرعان ەكەن سوندا ءبىر ۇلىس، ەلدىگىڭ.

عاسىرمەن جاساپ، ەركىن ەل بۇگىن بولساق تا،
بۇگىن مەن كەشە: قوس ۇعىم كەتپەس الشاققا.
شاڭىراق قۇرىپ، وتكەنىڭدە دە تۇرىپسىڭ
بۇلا كۇش بولىپ، ب ۇلىقسىپ سىرتقا سول شاقتا.

ىرگەلى ەل بوپ، حالقىڭ دا سول كەز كوشكە ەردى،
كۇي كەشىپ تەكتى، الدىڭنان سامال ەسكەن - ءدى.
مىڭ - مىڭداپ قولمەن وعىلاندارىڭ تۇرعاندا،
سۋىرىلسا قىلىش، سۇسىڭنان جاۋىڭ سەسكەندى.

باسىڭنان ءبىر كەز وتكىزىپ تالاي مايداندى،
ۇلدارىڭ تۇگىل، ارۋدا نامىس قايرالدى.
"جاعادان جاۋىڭ... تارتقاندا ءبورى ەتەكتەن"،
ۇرىسىڭ سالعان جەڭىسكە تالاي اينالدى.

ارۋاعىڭ جەبەپ، عالامات بويعا كۇش كىردى،
دۇشپانىڭ كوردى جاناردان نامىس - ۇشقىندى.
ەلىم دەپ تۋعان ەڭكەيمەي وتكەن ەرلەرىڭ
جاۋىنا تالاي اتىنىڭ جالىن قۇشتىردى.

مايداندا ۇلعا اكەلەر ەرلىك ۇقتىرىپ،
تىلەۋىن انا تىلەگەن كوزدە شىق تۇنىپ.
تاريحتىڭ كەيدە اششىسىن تاتقان كەزدە دە،
قالىپ ەڭ ءار كەز رۋحىڭ سىنباي تىك تۇرىپ.

قاعاندار ايلا ۇستانىپ سىرتقا سان قىرلى،
سانادا ەرلىك سان رەت قايتا جاڭعىردى.
وتاندى ولار ومىرىمەن قورعاپ، سونان - سوڭ
ۇرپاققا ءبارىن امانات ەتىپ قالدىردى.

ۋاقىتتىڭ ءالى كورەدى ۇرپاق جالعاسىن،
ۇلتىڭدى ءدايىم بابالار جەبەپ قولداسىن!
بولاشاعىڭنىڭ قاستەرلى باعىت سوقپاعىن
"ماڭگىلىك ەل" دەپ كورسەتىپ بەردى ەلباسىڭ.

شۋاعىن تاعى بەيبىت بوپ بۇگىن توكتى كۇن،
كەشەگى مايدان، كەشەگى داۋىل جوق بۇگىن.
قازاقستان دەپ وزگەلەر جاتسا نازار ساپ،
ءانۇران شالقىپ، ەڭكەيمەي تۇرسىن كوك تۋىڭ!

ەركىندىك الىپ، ازاتتىق دەدى ۇعىمىڭ،
تىنىشتىق كۇنمەن قۇندى بوپ تۇر عوي بۇگىنىڭ.
قالقانىڭ ەندى - ۇرپاققا ۇلتتىق تاربيەڭ،
قارۋىڭ بۇگىن - ۇرپاققا بەرەر ءبىلىمىڭ.

بولاشاق باردا كۇتەدى ءالى ۇلى سىن،
كەشە دە بولعان ەلدىگىڭ مەنەن ۇلىسىڭ.
كۇن شالماس ءجۇزىن الپەشتەپ ارۋ وسىرگەن
تامىرى تەرەڭ حالىقتىڭ سەن دە ءبىرىسىڭ.

تەكتىلىك مىنەز سەزىلىپ اۋەن - سازىڭنان،
شاتتىعىڭ بولسا كۇن مەنەن تۇنگە سوزىلعان.
ەل ەدىڭ سونداي، ەرلىككە تولى شەجىرەڭ
شاناقتان توگەر كيەلى ۇنمەن جازىلعان.

وتكەنىڭ بولىپ - بابادان تەكتى تۋعان ەڭ،
بۇگىنىڭ بولىپ - ەركىندىك كۇندى جىرلاپ ەڭ.
ەلىڭە زامان وزدىرعان سايىن ۋاقىت،
ۇلتىڭدى تانىپ، مويىنداي بەرسىن كۇللى الەم!

اۆتورى:
عابيدەن قوجاحمەت،
قىزىلوردا قالاسى