Silkway CA مەن China Railway Construction Engineering Group (CRCEG) بىرلەسكەن كاسىپورنى تاشكەنت وبلىسىندا كوپفۋنكسيونالدى لوگيستيكالىق ورتالىقتىڭ ەكىنشى كەزەڭىن سالۋعا كەلىسىمشارت جاساستى. جوبا اياسىندا جالپى اۋدانى شامامەن 60 مىڭ شارشى مەتر بولاتىن زاماناۋي قويما نىساندارى سالىنادى، دەپ حابارلايدى infohub.kz.
جاڭا قۋاتتار قۇرامىنا اۋدانى 41 472 شارشى مەتر ا+ سىنىپتى قويما جانە اۋدانى 18 432 شارشى مەتر كوپسەكسيالى توڭازىتقىش كەشەنى كىرەدى. توڭازىتقىش قويما كوپ ايماقتى تەمپەراتۋرالىق باقىلاۋ جۇيەسىمەن جابدىقتالادى، بۇل تەرەڭ مۇزداتۋدان ءونىمدى قىسقا مەرزىمدى سالقىنداتۋعا دەيىنگى ءارتۇرلى ساقتاۋ رەجيمدەرىن ءبىر ۋاقىتتا قولداۋعا مۇمكىندىك بەرەدى. سونداي-اق تاۋار قالدىقتارىن ەسەپكە الۋدىڭ جانە ونىمدەردى ءتۇسۋ مەرزىمى بويىنشا سۇرىپتاۋدىڭ اۆتوماتتاندىرىلعان جۇيەسى قاراستىرىلعان.
لوگيستيكالىق ورتالىقتىڭ ءبىرىنشى قۇرىلىس كەزەڭى 2026 جىلعى ناۋرىزدا باستالىپ، تەمىرجول ينفراقۇرىلىمىن، كونتەينەرلىك تەرمينال مەن قويما قۋاتتارىن قۇرۋدى قامتيدى. ەكى كەزەڭ دە ءبىر باس مەردىگەر – CRCEG قاتىسۋىمەن جۇزەگە اسىرىلادى، بۇل تەحنولوگيالىق شەشىمدەردىڭ ساباقتاستىعى مەن قۇرىلىستىڭ ءبىرىڭعاي ستاندارتتارىن قامتاماسىز ەتەدى. نەگىزگى جۇمىستاردى 2027 جىلى اياقتاۋ جوسپارلانۋدا.
كوپفۋنكسيونالدى لوگيستيكالىق ورتالىق تاشكەنت وبلىسىنىڭ يانگيۋل اۋدانىنداعى 159،4 گەكتار اۋماقتا سالىنۋدا. Silkway Central Asia جوباسى قازاقستان مەن وزبەكستاننىڭ ۇكىمەتارالىق ىنتىماقتاستىعى جانە ەكى ەل پرەزيدەنتتەرى قول جەتكىزگەن ۋاعدالاستىقتار اياسىندا ىسكە اسىرىلۋدا. قۇرىلىس وپەراتورى – 2025 جىلعى ناۋرىزدا قۇرىلعان، قازاقستاندىق PTC Holding كومپانيالار توبى مەن «Ўزبەكيستون تەمير يўللاري» اق قاتىسۋىمەن قۇرىلعان Silkway CA ج ش س بىرلەسكەن كاسىپورنى.
جاڭا ورتالىق PTC Holding كومپانياسىنىڭ قالىپتاسىپ كەلە جاتقان كولىكتىك-لوگيستيكالىق نىساندار جەلىسىنىڭ بولىگى بولادى. وعان قازاقستان مەن جۇڭگو شەكاراسىنداعى Dostyk TransTerminal كونتەينەرلىك تەرمينالى جانە گرۋزيانىڭ پوتي پورتىنداعى Poti TransTerminal كىرەدى. بۇل نىساندار قىتايدى، ورتالىق ازيانى، كاۆكازدى جانە قارا تەڭىزدى بايلانىستىراتىن حالىقارالىق باعدارلاردىڭ نەگىزگى ۋچاسكەلەرىندە جۇكتەردى وڭدەۋ مەن اۋىستىرىپ تيەۋدى قامتاماسىز ەتەدى. تاشكەنت وبلىسىنداعى ورتالىقتىڭ ىسكە قوسىلۋى ايماقتىڭ قويمالىق جانە تەرمينالدىق قۋاتتارىن كەڭەيتۋگە، سونداي-اق ونىڭ حالىقارالىق جەتكىزۋ تىزبەكتەرىندەگى ءرولىن ارتتىرۋعا مۇمكىندىك بەرەدى.