دەنەگە سۋرەت سالدىرۋ الدەقاشان جاپپاي ترەندكە اينالعانىمەن، بۇل پروسەدۋرانىڭ بيولوگيالىق سالدارى كوبىنە نازاردان تىس قالىپ قويادى. دارىگەرلەردىڭ ەسكەرتۋىنشە، تاتۋيروۆكا اللەرگيالىق رەاكسيالار مەن ينفەكسيالار تۋدىرىپ قانا قويماي، ەمدىك مانيپۋلياسيالاردى جۇرگىزۋدى دە قيىنداتادى، دەپ حابارلايدى infohub.kz سايتى.
تەرىگە ەنگەن پيگمەنتتەر ادامنىڭ يممۋندىق جۇيەسىمەن ارەكەتتەسەدى. ماماندار تاتۋيروۆكا سالۋ پروسەسىنىڭ ءوزى تەرىنىڭ جوعارعى قاباتتارىن جاراقاتتايتىنىن، مۇنىڭ دەنساۋلىققا تىكەلەي ءقاۋىپ ءتوندىرىپ، ءتۇرلى اسقىنۋلارعا اكەلۋى مۇمكىن ەكەنىن اتاپ وتەدى.
دارىگەرلەر ەڭ كوپ تارالعان قاۋىپتەردىڭ قاتارىنا پيگمەنتتەرگە اللەرگيالىق رەاكسيالاردى، باكتەريالىق ينفەكسيالاردى جانە سيا اينالاسىندا گرانۋلومالاردىڭ پايدا بولۋىن جاتقىزادى. سونىمەن قاتار ستەريلدەنبەگەن قۇرال-جابدىقتى پايدالانۋ اۋىر ءقاۋىپ توندىرەدى — ول ارقىلى ۆ جانە س گەپاتيتتەرى سياقتى ءقاۋىپتى ينفەكسيالار جۇعادى. قىزىل پيگمەنت قالعاندارىنا قاراعاندا اللەرگيانى ءجيى تۋدىرادى، ءارى رەاكسيا شەبەرگە بارعاننان كەيىن جىلدار وتكەن سوڭ دا ءبىلىنۋى مۇمكىن.
ءىرى نەمەسە جاڭا سالىنعان تاتۋيروۆكالار دا مەديسينالىق پروسەدۋرالاردى جۇرگىزۋدى قيىنداتادى. مىسالى، پلاستيكالىق حيرۋرگتەر قابىنۋ قاۋپىنە بايلانىستى جاڭا سۋرەت سالىنعان ايماقتاردا جوسپارلى وتا جاساۋدان باس تارتادى. ماگنيتتى-رەزونانستىق توموگرافيا كەزىندە قۇرامىندا تەمىر وكسيدى بار سيا كەيدە كۇيدىرۋ سەزىمىن تۋدىرادى، ال انەستەزيولوگتار ەپيدۋرالدى انالگەزيا كەزىندە تاتۋيروۆكالانعان تەرىنىڭ ءدال ورتاسىنان ينەنى سالۋدان قاشادى.