26 شىلدە كۇنى تاڭەرتەڭ «نوۋل» تايفۋنى قىتايدىڭ وڭتۇستىك جاعالاۋىنا سوقتى. ول گۋاندۋن پروۆينسياسى مەن كورشىلەس گونكونگتا قاتتى نوسەر مەن داۋىلدى جەل تۋدىردى. اۋا رايىنىڭ قولايسىزدىعىنا بايلانىستى گونكونگ حالىقارالىق اۋەجايىندا رەيستەر توقتاتىلدى، دەپ حابارلايدى infohub.kz.
Reuters اگەنتتىگىنىڭ حابارلاۋىنشا، تابيعي اپات گۋاندۋن پروۆينسياسىنىڭ 340 مىڭنان استام تۇرعىنىن ەۆاكۋاسيالاۋعا ءماجبۇر ەتتى. «نوۋل» بيىلعى جىلى 12ء-شى تروپيكتىك سيكلون بولىپ، شىلدە ايىندا قىتايعا جەتكەن ءۇشىنشى داۋىل بولدى.
گونكونگ بيلىگى الدىمەن داۋىلدى ەسكەرتۋ دەڭگەيىن №9 بەلگىسىنە دەيىن كوتەردى. ول كەزدە تايفۋن قالادان شامامەن 80 شاقىرىم قاشىقتىقتا ەدى. كەيىن ەسكەرتۋ دەڭگەيى №8-گە ءتۇسىرىلدى. بۇل دەڭگەي كاسىپورىنداردىڭ كوپشىلىگىن جابۋ جانە قوعامدىق كولىك جۇمىسىنا ەلەۋلى شەكتەۋلەر قويۋدى كوزدەيدى.
گونكونگ وبسەرۆاتورياسىنىڭ مالىمەتىنشە، تايفۋن ماتەريك ىشىنە جىلجۋىمەن بىرتىندەپ السىرەيدى، ءبىراق كۇشتى جەل مەن نوسەرلى جاڭبىر ءالى دە ساقتالۋدا. «سوڭعى ءبىر ساعاتتا 30 مم-دەن استام جاۋىن-شاشىن ءتۇستى جانە قارقىندى جاڭبىرلاردىڭ جالعاساتىنى كۇتىلۋدە»، — دەدى سينوپتيكتەر، تۇرعىنداردى كەنەتتەن بولاتىن سۋ تاسقىنى ءقاۋپى تۋرالى ەسكەرتىپ.
گونكونگ اۋەجايى اكىمشىلىگى رەيستەردىڭ جەرگىلىكتى ۋاقىت بويىنشا ساعات 18:00-دەن كەيىن قايتا باستالاتىنىن حابارلادى.
بۇعان دەيىن رەداكسيا ەۋروپاداعى ەكسترەمالدى ىستىقتان بولعان ورمان ورتتەرى تۋرالى حابارلاعان بولاتىن. يسپانيادا مادريد ماڭىنداعى ەلدى مەكەندەردەن 19 مىڭعا جۋىق ادام ەۆاكۋاسيالاندى. ەل ۇكىمەتى توتەنشە جاعداي جاريالادى. فرانسيانىڭ وڭتۇستىگىندە 60 مىڭنان استام تۇرعىن وتتان قاشىپ، ۇيلەرىن تاستاپ كەتتى.