تايۆاندا ءبىر ەر ادام ايەلىن وپاسىزدىق جاسادى دەپ كۇدىكتەنىپ، روبوت-شاڭسورعىشتى باقىلاۋ ءۇشىن پايدالانعان. الايدا ول ءوزى تۇرمەگە ءتۇستى، دەپ حابارلايدى infohub.kz.
ەر ادام 2021 جىلى ۇيلەنگەن، ال ەكى جىلدان كەيىن ايەلىنە كۇدىكتەنىپ، ونى باقىلاي باستاعان. ولار كۇيەۋىنىڭ اتا-اناسىمەن بىرگە تۇرعان، ءبىراق دەمالىستا قالا سىرتىنداعى ۇيگە باراتىن. بىردە ول سول جەردەن قوسىمشا ءتىس ششەتكاسىن تاۋىپ الىپ، كۇدىگى ودان ءارى ارتا تۇسكەن.
ءبىراز ۋاقىتتان كەيىن ول ايەلىنە اۋديوحابارلاما جىبەرۋ ءۇشىن روبوت-شاڭسورعىشتى قاشىقتان قوسقان. الايدا قۇرىلعىنىڭ تىكەلەي ەفيرى ايەلدىڭ باسقا ەركەكپەن بىرگە ەكەنىن كورسەتكەن. وسى دالەلمەن تايۆاندىق ايەلى مەن ونىڭ كوڭىلدەسىن نەكە قۇقىعىن بۇزعانى ءۇشىن سوتقا بەرگەن. ازاماتتىق سوت ولاردىڭ الدانىپ قالعان كۇيەۋگە 500 مىڭ تايۆان دوللارى (شامامەن 7 ملن تەڭگە) تولەۋى كەرەك دەپ شەشكەن.
الايدا ايەل جەكە ومىرگە ارالاسقانى ءۇشىن قارسى شاعىم تۇسىرگەن. تايۆان زاڭدارى بويىنشا، رۇقساتسىز ادامنىڭ جەكە ومىرىنە قاتىستى اقپاراتتى جازۋ نەمەسە تاراتۋ ءۇش جىلعا دەيىن باس بوستاندىعىنان ايىرۋ جانە 300 مىڭ تايۆان دوللارىنا دەيىن ايىپپۇل سالۋعا اكەپ سوعادى. ءسويتىپ، سوت الدانىپ قالعان كۇيەۋدى بەس ايعا باس بوستاندىعىنان ايىرىپ، 150 مىڭ تايۆان دوللارى (شامامەن 2 ملن تەڭگە) ايىپپۇل سالعان.
سوت «نەكە مىندەتتەرى ادامنىڭ جەكە ومىرىنە قول سۇعىلماۋشىلىق قۇقىعىن جويمايدى» دەپ شەشكەن.
بۇعان دەيىن Kursiv LifeStyle اقش-تاعى ميلليونەر زاڭگەردىڭ پروكۋرور ايەلىنە وپاسىزدىق جاساعانى بەلگىلى بولعان سوڭ، جوعارى جالاقىلى جۇمىستان قۋىلعانىن جازعان.