الماتىدا «تازا قازاقستان» رەسپۋبليكالىق باعدارلاماسى اياسىندا وقۋشىلار مەن ولاردىڭ وتباسىلارىندا ەكولوگيالىق ادەتتەردى قالىپتاستىرۋعا باعىتتالعان GREEN UP ەكولوگيالىق جوباسى ستارت الدى. جوبانىڭ تۇساۋكەسەرى 31 تامىزدا قالالىق №224 مەكتەپتە ءوتتى، دەپ حابارلايدى infohub.kz سايتى.
جوبا ECO Network قاتىسۋىمەن، قالالىق ەكولوگيا جانە قورشاعان ورتا باسقارماسى مەن Eco Almaty قولداۋىمەن جۇزەگە اسىرىلۋدا. العاشقى پيلوتتىق ىسكە قوسۋ بوستاندىق اۋدانىندا وتۋدە. Green APP Almaty باعدارلاماسىندا اۋدانداعى بالاباقشالاردى، مەكتەپتەر مەن كوللەدجدەردى بىرىكتىرۋ جوسپارلانۋدا. باستامانىڭ نەگىزى ماركوۆ كوشەسى، 44 مەكەنجايىنداعى جانە Satbayev University-دەگى ەكوحابتار، سونداي-اق econetwork.me سيفرلىق پلاتفورماسى بولدى.
قاتىسۋشىلار ۇيدە قايتا وڭدەلەتىن شيكىزاتتى جيناپ، ونى ەكوحابتارعا تاپسىرا الادى. ناتيجەلەر ءموبيلدى قوسىمشادا تىركەلىپ، ءبىلىم بەرۋ مەكەمەلەرىنىڭ جالپى رەيتينگىندە ەسكەرىلەدى. ەكولوگيالىق اكسيالار مەن ۆولونتەرلىك ءىس-شارالارعا قاتىسقانى ءۇشىن دە بالل جيناۋعا بولادى.
№224 مەكتەپ ديرەكتورى رايزا احمەتوۆا ەكولوگيالىق ادەتتەردى ەرتە جاستان قالىپتاستىرۋدىڭ ماڭىزدىلىعىن اتاپ ءوتتى. «ءبىزدىڭ ماقساتىمىز — وقۋشىلاردا ەكولوگيالىق مادەنيەتتى قالىپتاستىرىپ، قورشاعان ورتاعا جاۋاپكەرشىلىكپەن قاراۋدى كۇندەلىكتى ادەتكە اينالدىرۋ. بالا تابيعاتتى قورعاۋ قاجەتتىگىن ءبىلىپ قانا قويماي، ءوز ىس-ارەكەتىمەن ونى ساقتاۋعا ناقتى ۇلەس قوسا الاتىنىن ءتۇسىنۋى ماڭىزدى»، — دەدى رايزا احمەتوۆا.
تۇساۋكەسەر بارىسىندا وقۋشىلارعا قالدىقتاردى قالاي دۇرىس سۇرىپتاۋ كەرەكتىگى جانە قانداي ماتەريالدار قايتا وڭدەۋگە قابىلداناتىنى كورسەتىلدى. وقۋشىلار ماكۋلاتۋرا مەن پلاستيك قالدىقتاردى اكەلىپ، قايتا وڭدەۋگە تاپسىردى.
جوبا اۆتورى ەۆگەني مۋحامەدجانوۆ ەكولوگيالىق ادەتتەر تاجىريبە مەن بۇكىل وتباسىنىڭ قاتىسۋى ارقىلى ءتيىمدى قالىپتاساتىنىن اتاپ ءوتتى. «ەكولوگيالىق مادەنيەت ادامنىڭ كۇن سايىن ورىندايتىن قاراپايىم ارەكەتتەردەن باستالادى. ەگەر بالا ۇيدە قالدىقتاردى سۇرىپتاپ، ولاردى قايتا وڭدەۋگە اكەلسە، بىرتىندەپ بۇل پروسەسكە بۇكىل وتباسى تارتىلادى. ءبىزدىڭ مىندەتىمىز — ەكولوگيالىق مىنەز-ق ۇلىقتى تۇسىنىكتى، قولجەتىمدى جانە قىزىقتى ەتۋ»، — دەپ ءتۇسىندىردى ەۆگەني مۋحامەدجانوۆ.
بولاشاقتا قاتىسۋشىلار ەكولوگيالىق كلۋبتار قۇرا الادى، ءوز باستامالارىن ۇسىنا الادى جانە قالالىق تابيعات قورعاۋ اكسيالارىنا قاتىسا الادى. مەكتەپ وقۋشىلارى، كوللەدج ستۋدەنتتەرى، اتا-انالار جانە ءبىلىم بەرۋ مەكەمەلەرىنىڭ قىزمەتكەرلەرى ءۇشىن ۆولونتەرلىك باعدارلامالار دا قاراستىرىلعان.
جوبا ىنتالاندىرۋ جۇيەسىن قامتيدى: قاتىسۋشىلار مەن ءبىلىم بەرۋ مەكەمەلەرى بەلسەندىلىگى مەن بەلگىلى ءبىر قايتا وڭدەلەتىن شيكىزات تۇرلەرىن جيناعانى ءۇشىن جۇلدەلەر الا الادى. بولاشاقتا مودەلدى الماتىنىڭ باسقا اۋداندارىنا تاراتۋ جوسپارلانۋدا. GREEN UP ەكولوگيالىق اعارتۋدى، سيفرلىق قۇرالداردى جانە پراكتيكالىق ىس-ارەكەتتەردى بىرىكتىرىپ، قالدىقتارعا جاۋاپكەرشىلىكپەن قاراۋدى كۇندەلىكتى ءومىردىڭ ءبىر بولىگىنە اينالدىرادى.