جاقىندا الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا جۇرەكتى توقتاتپاي، كەۋدە قۋىسىن اشپاي جاسالاتىن ءبىرقاتار از ينۆازيالى وتالار جۇرگىزىلدى. اۋىر ميترالدى رەگۋرگيتاسياسى بار پاسيەنتتەرگە TEER (ترانسكاتەتەرلى ميترالدى كلاپان پلاستيكاسى، «شەتى-شەتىنە» تەحنولوگياسى) ادىسىمەن ەم جاسالدى… دەپ حابارلادى infohub.kz سايتى.
شەتى-شەتىنە (TEER) تەحنولوگياسى بويىنشا ترانسكاتەتەرلى ميترالدى كلاپان پلاستيكاسىنا ارنالعان حالىقارالىق پراكتيكالىق شەبەرلىك سىنىبى قازاقستاندىق كارديولوگتار مەن جۇڭگو ماماندارىن بىرىكتىردى. بىرلەسكەن وتالارعا شاندۋن ۋنيۆەرسيتەتىنىڭ سيلۋ اۋرۋحاناسى ەحوكارديوگرافيا دەپارتامەنتىنىڭ ديرەكتورى، پروفەسسور ليۋ يان، قۇرىلىمدىق ارالاسۋلارعا ينتراوپەراسيالىق ەحوكارديوگرافيالىق سۇيەمەلدەۋ بويىنشا حالىقارالىق ساراپشى، پروفەسسور ان گۋيپەن جانە مامان چجان چاو قاتىستى.
قازاقستان تاراپىنان جوعارى تەحنولوگيالى ارالاسۋلاردى عزي-دىڭ رەنتگەنەندوۆاسكۋليارلىق وپەراسيالىق ءبولىمىنىڭ مەڭگەرۋشىسى الەكسەي كولەسنيكوۆ باسقارعان مۋلتيديسيپلينارلى توپ ورىندادى. وپەراسيالىق توپ قۇرامىنا ينتەرۆەنسيالىق كارديولوگتار المات قالجانوۆ، نۇرجان تەمەنوۆ، ارىستان كۋجۋكەيەۆ جانە مارجان ءىلياس قىزى كىردى.
دەنساۋلىق ساقتاۋ مينيسترلىگىنىڭ مالىمەتىنشە، الدىمەن دارىگەرلەر پاسيەنتتەردى كلينيكالىق تالداۋدان وتكىزىپ، ناۋقاستاردى ىرىكتەۋدىڭ زاماناۋي تاسىلدەرى مەن TEER پروسەدۋراسىن ورىنداۋ ەرەكشەلىكتەرىن تالقىلادى. «بارلىق وتا ميترالدى كلاپان قاقپاقشالارىن تاۋەلسىز ۇستاپ، ميترالدى رەگۋرگيتاسيانى ءتيىمدى جويۋعا مۇمكىندىك بەرەتىن زاماناۋي DragonFly جۇيەسىن قولدانۋ ارقىلى ورىندالدى»، — دەلىنگەن حابارلامادا.
وڭەش ارقىلى ەحوكارديوگرافيالىق باقىلاۋدىڭ ارقاسىندا DragonFly جۇيەسىنىڭ ءدال ورنالاسۋى، ناتيجەنى وبەكتيۆتى باعالاۋ جانە بارلىق كەزەڭدەردە پاسيەنتتەردىڭ قاۋىپسىزدىگى قامتاماسىز ەتىلدى. بارلىق وتا ءساتتى ءوتتى.
عزي ماماندارى كارديوحيرۋرگياداعى جاڭا تەحنولوگيانى مەڭگەرۋ اۋىر ميترالدى رەگۋرگيتاسياسى بار پاسيەنتتەرگە جوعارى تەحنولوگيالى مەديسينالىق كومەك كورسەتۋ مۇمكىندىكتەرىن كەڭەيتىپ، ولاردىڭ ءومىر ءسۇرۋ ساپاسىن ارتتىرۋعا مۇمكىندىك بەرەتىنىن اتاپ ءوتتى.