جاڭا وقۋ جىلى قارساڭىندا قازاقستاندا اتا-انالاردى مەملەكەتتىك قولداۋ شارالارىنا قاتىستى اداستىرۋى مۇمكىن اقپارات تارالۋدا. ورتالىق كوممۋنيكاسيالار قىزمەتى جانىنداعى دەزىنفورماسياعا قارسى كۇرەس ورتالىعى تەگىن تاماق پەن ماتەريالدىق كومەك — بۇل ءارتۇرلى شارالار ەكەنىن جانە ولار بارلىق وقۋشىلارعا بەرىلمەيتىنىن ءتۇسىندىردى، دەپ حابارلايدى infohub.kz سايتى.
دەزىنفورماسياعا قارسى كۇرەس ورتالىعىنىڭ Telegram-ارناسىندا وقۋ جىلى قارساڭىندا قازاقستاندا تەگىن مەكتەپ تاماعى مەن بالانى مەكتەپكە دايىنداۋعا ارنالعان ماتەريالدىق كومەك بىردەي مەملەكەتتىك قولداۋ شاراسى جانە بارلىق وقۋشىلارعا تيەسىلى دەگەن قاتە تۇسىنىك تۋدىراتىن اقپارات تارالىپ جاتقانى اتاپ ءوتىلدى.
«بۇل مالىمدەمە قولدانىستاعى زاڭناماعا سايكەس كەلمەيدى. بۇل — ءارتۇرلى ماقساتتارى، بەرىلۋ شارتتارى مەن الۋشىلار شەڭبەرى بار ەكى دەربەس مەملەكەتتىك قولداۋ شاراسى»، — دەپ ءتۇسىندىردى ورتالىقتا.
«ءبىلىم تۋرالى» زاڭنىڭ 6-بابىنا سايكەس، جەرگىلىكتى اتقارۋشى ورگاندار ءبىلىم الۋشىلار مەن تاربيەلەنۋشىلەرگە قارجىلىق جانە ماتەريالدىق كومەك كورسەتۋدى قامتاماسىز ەتەدى. مۇنداي كومەكتى بەرۋ ءتارتىبى ق ر ۇكىمەتىنىڭ 2008 جىلعى 25 قاڭتارداعى قاۋلىسىمەن بەلگىلەنگەن.
«كومەك، اتاپ ايتقاندا، اتاۋلى الەۋمەتتىك كومەك الۋعا قۇقىعى بار وتباسىلاردىڭ بالالارىنا، جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلارعا، جەتىم بالالارعا جانە اتا-اناسىنىڭ قامقورلىعىنسىز قالعان بالالارعا، سونداي-اق زاڭنامادا كوزدەلگەن وزگە دە ساناتتارعا بەرىلەدى»، — دەلىنگەن حابارلامادا.
مەملەكەتتىك ورتا ءبىلىم بەرۋ ۇيىمدارىندا 1-4 سىنىپ وقۋشىلارىنىڭ بارلىعى الەۋمەتتىك مارتەبەسىنە قاراماستان تەگىن ىستىق تاماقپەن قامتاماسىز ەتىلەتىنى، سونداي-اق 5-11 سىنىپ وقۋشىلارىنىڭ جەكەلەگەن الەۋمەتتىك وسال ساناتتارىنا جاتاتىندارى دا قامتىلاتىنى اتاپ ءوتىلدى.
«ءوز كەزەگىندە، كيىم، اياق كيىم جانە مەكتەپ-جازۋ قۇرالدارىن ساتىپ الۋعا ارنالعان ماتەريالدىق كومەك اتاۋلى سيپاتقا يە جانە زاڭنامادا كوزدەلگەن ءتيىستى نەگىزدەرى بار مۇقتاج بالالار مەن وتباسىلارعا بەرىلەدى»، — دەپ قوستى ورتالىقتا.
وسىلايشا، ورتالىقتىڭ اقپاراتى بويىنشا، جەكەلەگەن ساناتتاعى وقۋشىلارعا اتاۋلى كومەكتى بارلىق وقۋشىلارعا تيەسىلى تولەم رەتىندە ۇسىنۋ اتا-انالاردا نەگىزسىز ءۇمىت تۋدىرىپ، مەملەكەتتىك الەۋمەتتىك ساياساتتىڭ مازمۇنىن بۇرمالايدى.