اقش-تىڭ تەحاس شتاتىندا 40 جاستاعى ەر ادام كاپيتولي عيماراتىنا قارۋلى شابۋىل جاساماق بولدى دەگەن كۇدىكپەن ۇستالدى. بۇل تۋرالى تەحاس قوعامدىق قاۋىپسىزدىك دەپارتامەنتى مالىمدەدى، دەپ حابارلايدى infohub.kz سايتى.
ۆەدومستۆو حابارلاماسىندا وستين قالاسىندا بەيسەنبى كۇنى زورلىق-زومبىلىق ارەكەتىنە دايىندالىپ جۇرگەن ادام تۋرالى «ناقتى اقپارات» تۇسكەنى ايتىلعان.
NBC 5 DFW تەلەارناسى قول جەتكىزگەن ۇستاۋ وردەرىنىڭ قۇجاتىنا سايكەس، بەنني كالدەرا كىشى ەسىمدى كۇدىكتى دوسىنا: «مەن كاپيتوليگە بارامىن جانە ونى وقپەن تالقاندايمىن»، — دەپ ايتقان. پوليسيا قۇجاتتارىندا ول دوسىنا: «مەن سەنى جاقسى كورەمىن، ەگەر مەنى ءبىرجولا كورمەسەڭ»، — دەگەنى جازىلعان.
NBC 5 DFW مالىمەتىنشە، كالدەرا امەريكالىق يزرايلدىك قوعامدىق ىستەر كوميتەتىنە (Aipac) اشۋلانعانىن بىلدىرگەن. «بۇل ادامداردى جويۋ كەرەك»، — دەپ ايتقان ول.
اقپارات سەيسەنبى كۇنى كەشكە تۇسكەن. ارنايى جاساق ساربازدارى كالدەرانى سارسەنبى كۇنى تاڭعى ساعات 3 شاماسىندا سان-انتونيو ماڭىنداعى كونۆەرس قالاسىنداعى تۇرعىن ۇيدەن ۇستاعان.
سوت قۇجاتتارىنا سايكەس، وعان مەملەكەتتىك قىزمەتكەرگە قاتىستى تەرروريستىك ءقاۋىپ ءتوندىرۋ بابى بويىنشا اۋىر قىلمىس ايىپ تاعىلدى. ول 75 مىڭ دوللار كەپىل تولەپ، تۇرمەدەن بوساتىلعان.
كالدەرانىڭ ادۆوكاتىنان پىكىر سۇراپ حابارلاسۋعا ارەكەت جاسالدى.
قوعامدىق قاۋىپسىزدىك قىزمەتكەرلەرى ءقاۋىپ پەن ۇستاۋ تۋرالى شتات زاڭ شىعارۋشىلارىنا سارسەنبى كۇنى تاڭەرتەڭ حابارلاعان. كاپيتولي عيماراتى قالىپتى جۇمىس ۋاقىتىندا اشىق بولدى.
تەحاس سەناتىنىڭ حاتشىسى پەتسي سپوۋ حابارلاماسىندا تەرگەۋ بارىسىندا كاپيتوليدە كۇزەت كۇشەيتىلەتىنىن ايتقان.
گۋبەرناتور گرەگ ەببوتتىڭ سوزىنشە، ۇستاۋعا شتاتتىڭ قوعامدىق قاۋىپسىزدىك دەپارتامەنتىنە اقش فەدەرالدىق تەرگەۋ بيۋروسى كومەكتەسكەن.
«تەحاس ءبىزدىڭ كاپيتوليگە قارسى زورلىق-زومبىلىق قاۋىپتەرىنە توزبەيدى»، — دەدى گۋبەرناتور الەۋمەتتىك جەلىدەگى مالىمدەمەسىندە.