امەريكاندىق ءانشى تەيلور سۆيفت رود-ايلەند شتاتىنىڭ تۇرعىنىنا 50 مىڭ دوللار (شامامەن 23،3 ميلليون تەڭگە) اۋداردى. بۇل قاراجات جول اپاتىنان كەيىن جاسوسپىرىمدەردى قۇتقارۋ كەزىندە اۋىر جاراقات العان ايەلگە ارنالعان، دەپ حابارلايدى infohub.kz سايتى.
وقيعا 18 شىلدەدە حوپكينتون قالاسىنداعى I-95 تاس جولىندا قاتتى جاڭبىر كەزىندە بولعان. ەشلي تاۋنتون جاسوسپىرىمدەر وتىرعان كولىكتىڭ باسقارۋدان شىعىپ، جولدان اۋىپ كەتكەنىن كورگەن. ول دەرەۋ توقتاپ، زارداپ شەككەندەرگە كومەككە ۇمتىلدى.
ول جاسوسپىرىمدەرگە كولىكتەن شىعۋعا كومەكتەسىپ جاتقاندا، تاعى ءبىر كولىك باسقارۋدان شىعىپ، تىكە ولاردىڭ قاراي بەتتەگەن. ەشليدىڭ كۇيەۋىنىڭ ايتۋىنشا، ول سوڭعى ساتتە جاسوسپىرىمدەردىڭ ءبىرىن جولدان يتەرىپ جىبەرىپ، سوققىنى ءوز موينىنا العان.
ناتيجەسىندە تاۋنتون اياعىنان اۋىر جاراقات الىپ، ىشكى اعزالارى زاقىمدانعان. ونىڭ جىڭىشكە جانە توق ىشەكتەرى زارداپ شەككەن، باۋىرى مەن كوكەتى جارىلعان، سونىڭ سالدارىنان ءبىر وكپەسى جابىلىپ قالعان. ايەلگە كەمىندە ءۇش وپەراسيا جاساۋ قاجەت بولعان.
وسى ۋاقىت بويى ەشلي الەۋمەتتىك جەلىلەردە قالپىنا كەلۋ پروسەسى تۋرالى ءبولىسىپ وتىرعان. ول اۋرۋحاناداعى، دارىلىك كومادا جاتقان ساتتەرىن سۋرەتكە ءتۇسىرىپ، كەيىن اياعىنا فيكساتور تاعىپ ۇيگە ورالعانىن كورسەتكەن.
ءسۆيفتتىڭ قايىرىمدىلىعى تۋرالى ەشلي جۇما كۇنى ءبىلىپ، مۇنداي كومەك كۇتپەگەنىن ايتقان. ول الەۋمەتتىك جەلىلەردە ءانشىنىڭ بۇل ارەكەتىن كەرەمەت دەپ اتاپ، قولداۋى ءۇشىن العىس بىلدىرگەن.
50 مىڭ دوللار كولەمىندەگى قايىرىمدىلىق قاراجاتى ءوز ءومىرىن قاتەرگە تىگىپ، باسقالاردى ءقاۋىپتى جاعدايدان قۇتقارعان ايەلدىڭ ەمدەلۋ شىعىندارىن جابۋعا جۇمسالادى.
بۇعان دەيىن Kursiv LifeStyle تەيلور سۆيفت پەن ترەۆيس كەلسيدىڭ مىڭ قوناق قاتىساتىن توي وتكىزۋدى جوسپارلاپ وتىرعانىن حابارلاعان.