ۇلىبريتانيانىڭ سۇراۋى بويىنشا ماياميدە بلوگەرلەر ەندريۋ جانە تريستان تەيت ۇستالدى. بريتاندىق پروكۋراتۋرا باۋىرلارعا ونداعان جاڭا ايىپ تاعىپ، ولاردى ەكستراديسيالاۋ ءراسىمىن باستادى، دەپ حابارلايدى infohub.kz سايتى.
ەندريۋ تەيتكە زورلاۋ، سونداي-اق جىنىستىق قاناۋ ءۇشىن ادام ساۋداسى جانە كامەلەتكە تولماعانداردىڭ ادەپسىز بەينەلەرىن ساقتاۋ بويىنشا جەتى جاڭا ايىپ تاعىلدى. تريستان تەيت ەكى زورلاۋ وقيعاسى جانە ءۇش جىنىستىق قاناۋ ماقساتىندا ادام ساۋداسىن ۇيىمداستىرۋ ەپيزودى بويىنشا ايىپتالۋدا.
باۋىرلارعا قاتىستى ايىپتاردىڭ جالپى سانى ۇستالعاننان كەيىن (19 شىلدە) بىرنەشە كۇن ىشىندە 21-دەن 59-عا دەيىن ءوستى.
پروكۋراتۋرا قوسىمشا دالەلدەمەلەر الىنعاننان كەيىن جاڭا ايىپتار پايدا بولعانىن حابارلادى. بريتاندىق بيلىكتىڭ مالىمەتىنشە، ءىس بويىنشا بولجامدى جابىرلەنۋشىلەر سانى جەتىگە جەتتى.
«جاڭا ايىپتاردى تاعۋ تۋرالى شەشىمدەر بەدفوردشير پوليسياسىنان قوسىمشا دالەلدەمەلەر پاكەتى الىنعاننان كەيىن قابىلداندى. ناتيجەسىندە ءىس بويىنشا بولجامدى قۇربانداردىڭ جالپى سانى جەتىگە جەتتى»، — دەپ مالىمدەدى كورولدىك پروكۋراتۋرانىڭ اسا اۋىر قىلمىستار ءبولىمىنىڭ باسشىسى مالكولم ماكحاففي.
سونداي-اق اقش فەدەرالدى مارشالدار قىزمەتى باۋىرلاردىڭ ەكستراديسيا ءراسىمى اياسىندا قاماۋعا الىنعانىن راستادى. ءقازىر بريتاندىق بيلىك ولاردىڭ بەرىلۋىنە قول جەتكىزۋدى كوزدەپ وتىر.
تەيت باۋىرلارى ءوز كىناسىن مويىندامايدى. ولاردىڭ ادۆوكاتى دجوزەف ماكبرايد جاڭا ايىپتاردى «ساياسي شابۋىل» دەپ سانايتىنىن جانە سوت باۋىرلاردى بوساتاتىنىنا سەنىمدى ەكەنىن مالىمدەدى.