تەمىرتاۋ ماڭىنداعى ەلدى مەكەندەردىڭ بىرىندە پوليسيا قىزمەتكەرلەرى 125 ءتۇپ ەسىرتكى وسىمدىگى وسىرىلگەن جىلىجايدى انىقتادى. ولاردى وسىرۋگە كۇدىكتى رەتىندە 19 جاستاعى جەرگىلىكتى تۇرعىن ۇستالدى، دەپ حابارلايدى infohub.kz.
تەمىرتاۋعا جاقىن ورنالاسقان ەلدى مەكەندەردىڭ بىرىندە پوليسەيلەر ارنايى جابدىقتالعان جىلىجايدى انىقتادى، وندا ەسىرتكى قۇرامدى وسىمدىكتەر وسىرىلگەن. ءىس-شارا رەسپۋبليكالىق «قاراسورا-2026» جەدەل-پروفيلاكتيكالىق ءىس-شاراسى بارىسىندا وتكىزىلدى.
كۇدىكتى 19 جاستاعى جەرگىلىكتى تۇرعىن بولىپ شىقتى. ونى تەمىرتاۋ قالالىق پوليسيا باسقارماسىنىڭ ەسىرتكى قىلمىسىنا قارسى كۇرەس ءبولىمىنىڭ قىزمەتكەرلەرى قاراعاندى وبلىسى جانە ۇلىتاۋ وبلىسى بويىنشا قىلمىستىق-اتقارۋ جۇيەسى دەپارتامەنتىمەن بىرلەسىپ ۇستادى.
«جەكە ءۇيدىڭ اۋماعىن تەكسەرۋ كەزىندە، قوسالقى جەر ۋچاسكەسىندە جانە ارنايى جابدىقتالعان جىلىجايدا پوليسەيلەر 125 ءتۇپ كەنەپ تۇقىمداس ەسىرتكى وسىمدىكتەرىن تاپتى. ءتىنتۋ بارىسىندا شارۋاشىلىق عيماراتتارىنىڭ بىرىنەن كەپتىرىلگەن وسىمدىك تەكتەس ەسىرتكى زاتتارى جانە تىركەلمەگەن اڭشى مىلتىعى الىندى. الدىن الا مالىمەتتەر بويىنشا، كۇدىكتى كەنەپتى ارنايى جاسالعان جاعدايلاردى پايدالانا وتىرىپ، ءوز بەتىنشە وسىرگەن»، – دەدى قاراعاندى وبلىسى پوليسيا دەپارتامەنتى باستىعىنىڭ ءبىرىنشى ورىنباسارى قۋانىش ورىنبەتوۆ.
وسىرۋگە تىيىم سالىنعان ەسىرتكى قۇرامدى وسىمدىكتەردى زاڭسىز ءوسىرۋ فاكتىسى بويىنشا قىلمىستىق كودەكستىڭ 300-بابى 1-بولىگىمەن سوتقا دەيىنگى تەرگەۋ باستالدى.
پوليسيا مۇنداي وسىمدىكتەردى زاڭسىز ءوسىرۋ قىلمىستىق جاۋاپكەرشىلىككە اكەپ سوعاتىنىن ەسكە سالدى. ەسىرتكىنىڭ زاڭسىز اينالىمىنا بايلانىستى قىلمىستاردى انىقتاۋ جۇمىسى «قاراسورا-2026» جەدەل-پروفيلاكتيكالىق ءىس-شاراسى اياسىندا جالعاساتىن بولادى.