ساپار ساتايەۆ تەمىرتاۋعا جاڭا اكىم بولىپ تاعايىندالدى. بۇعان دەيىن ول بالقاش قالاسىنىڭ باسشىسى قىزمەتىن اتقارعان، دەپ حابارلايدى infohub.kz.
قاراعاندى وبلىسى اكىمدىگىنىڭ رەسمي سايتىندا حابارلانعانداي، قازاقستان رەسپۋبليكاسى پرەزيدەنتىنىڭ اكىمشىلىگىمەن جانە قالالىق ءماسليحات دەپۋتاتتارىمەن كەلىسۋ بويىنشا تەمىرتاۋ اكىمى بولىپ ساپار ساتايەۆ تاعايىندالدى.
جاڭا باسشىنى قالا اكتيۆىنە قاراعاندى وبلىسىنىڭ اكىمى ەرماعانبەت بولەكپايەۆ تانىستىردى. ول قالا باسشىسىنىڭ الدىندا تۇرعان باسىم مىندەتتەردى اتاپ ءوتتى.
«ساپار ساتاەۆتىڭ مەملەكەتتىك باسقارۋ جۇيەسىندە ايتارلىقتاي تاجىريبەسى بار، الەۋمەتتىك-ەكونوميكالىق دامۋ ماسەلەلەرىن جاقسى بىلەدى جانە قاجەتتى داعدىلارعا يە. سونىمەن قاتار، بالقاشتاعى جۇمىس تاجىريبەسى وعان ءىرى ونەركاسىپتىك كاسىپورىندارمەن ءتيىمدى ءوزارا ءىس-قيمىل جاساۋعا مۇمكىندىك بەردى. بۇل تاجىريبە تەمىرتاۋدا دا قالا قۇرۋشى مەتاللۋرگيالىق كاسىپورىنمەن ىنتىماقتاستىقتى ودان ءارى دامىتۋ ءۇشىن ءساتتى قولدانىلادى دەپ سەنەمىن. ونىڭ باسشىلىعىمەن جىلۋمەن جانە سۋمەن جابدىقتاۋدى جاڭعىرتۋ، جولداردى جوندەۋ بويىنشا اۋقىمدى جوبالار ىسكە اسىرىلدى، بۇل كوممۋنالدىق ينفراقۇرىلىمنىڭ سەنىمدىلىگى مەن كورسەتىلەتىن قىزمەتتەردىڭ ساپاسىن ەداۋىر ارتتىرۋعا مۇمكىندىك بەردى. ساپار قايىركەن ۇلى، ءسىزدىڭ باستى مىندەتىڭىز – تەمىرتاۋلىقتاردىڭ ءومىر ءسۇرۋ ساپاسىن ارتتىرۋ، قولايلى جانە ءقاۋىپسىز قالالىق ورتا قۇرۋ، سونداي-اق قالانىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋ»، — دەدى ءوڭىر باسشىسى.
ساپار ساتايەۆ ەڭبەك جولىن 2002 جىلى «قازاقاۆتوجول» رەسپۋبليكالىق مەملەكەتتىك كاسىپورنىندا باستادى. ءار جىلدارى «بوتاقارا سۋ شارۋاشىلىعى» كوممۋنالدىق مەملەكەتتىك قازىنالىق كاسىپورنىنىڭ ديرەكتورىنىڭ ورىنباسارى جانە ديرەكتورىنىڭ مىندەتىن اتقارۋشى بولىپ جۇمىس ىستەدى. مەملەكەتتىك قىزمەتتە 2010 جىلدان بەرى. قاراعاندى وبلىسى بۇقار جىراۋ اۋدانىنىڭ بوتاقارا كەنتىن باسقاردى. 2013–2015 جىلدارى اباي قالاسىنىڭ اكىمى قىزمەتىن اتقاردى، كەيىن بۇقار جىراۋ اۋدانى اكىمىنىڭ ورىنباسارى بولدى. كەيىنىرەك پريوزەرسك قالاسىنىڭ اكىمى بولدى. 2023 جىلدىڭ مامىرىنان جاڭا لاۋازىمعا تاعايىندالعانعا دەيىن بالقاش قالاسىن باسقاردى.
ءوز كەزەگىندە ساپار ساتايەۆ تەمىرتاۋدىڭ بۇگىنگى ءومىرىن، قانداي ماسەلەلەر ەرەكشە نازار اۋدارۋدى قاجەت ەتەتىنىن جانە تۇرعىنداردىڭ قانداي شەشىمدەردى كۇتەتىنىن جاقسى بىلەتىنىن اتاپ ءوتتى. «تەمىرتاۋ — ادال ەڭبەكتى، جاۋاپكەرشىلىكتى جانە ناقتى ىستەردى باعالايتىن قالا. مەنىڭ قىزمەتىم دە وسىعان باعىتتالادى»، — دەپ اتاپ ءوتتى ساپار ساتايەۆ.
ەسكە سالايىق، بىرنەشە كۇن بۇرىن عالىم ءاشىموۆ تەمىرتاۋ اكىمى قىزمەتىنەن كەتەتىنىن مالىمدەگەن ەدى. ول بۇل لاۋازىمدى 2024 جىلدىڭ قىركۇيەگىنەن بەرى اتقارىپ كەلگەن.