2026 جىلعى ماۋسىمدا قازاقستاندا بىرنەشە كوپجىلدىق تەمپەراتۋرا رەكوردتارى جاڭارتىلدى. ەڭ «ەسكىسى» — پاۆلودارداعى 71 جىل بويى ساقتالعان رەكورد، دەپ حابارلايدى infohub.kz.
قازگيدرومەتتىڭ مالىمەتىنشە، ەلدىڭ باسىم بولىگىندە ماۋسىم كليماتتىق نورمادان 1–5 گرادۋسقا جىلى بولدى. كوپتەگەن وڭىرلەردە كۇندىزگى تەمپەراتۋرا +30…+38 °C، ال وڭتۇستىكتە كەي جەرلەردە +43 °C-قا دەيىن جەتتى. سينوپتيكتەر مۇنى قۇرعاق تروپيكتىك اۋا ماسسالارىنىڭ اسەرىمەن ءتۇسىندىردى. ال قازاقستاننىڭ باتىسىندا اتلانتيكالىق سيكلوندار سالدارىنان سالقىن ءارى جاڭبىرلى اۋا رايى ورنادى، ءبىرقاتار اۋدانداردا جاۋىن-شاشىن مولشەرى نورمادان 2–5 ەسەگە ارتىق ءتۇستى.
1 ماۋسىمدا پاۆلوداردا اۋا تەمپەراتۋراسى +36،8 °C-قا دەيىن كوتەرىلىپ، 1955 جىلعى بۇرىنعى ماكسيمۋمدى (+36،1 °C) ارتتا قالدىردى. سول كۇنى الماتىدا دا جاڭا رەكورد ورنادى: +34،5 °C (1967 جىلى +34،4 °C بولعان). 8 ماۋسىمدا استانادا تەرمومەترلەر +33،7 °C-قا جەتىپ، 2023 جىلعى رەكوردتان (+33،6 °C) اسىپ ءتۇستى. 29 ماۋسىمدا شىعىستا ماكسيمۋمدار جاڭارتىلدى: سەمەيدە +38 °C تىركەلدى (بۇرىنعى رەكورد 1992 جىلى +36،7 °C)، ال وسكەمەندە تەمپەراتۋرا +36،7 °C-قا جەتىپ، 1974 جىلعى كورسەتكىشتەن (+36 °C) استى.
ىستىقتان بولەك، ماۋسىم رەكوردتىق جاۋىن-شاشىنمەن دە ەرەكشەلەندى. ءبىرقاتار وڭىرلەردە تاۋلىك ىشىندە ءبىر ايلىق نورمادان ەكى ەسەگە دەيىن جاڭبىر جاۋدى. مىسالى، 3 ماۋسىمدا اقتوبە وبلىسىنداعى ويىل مەتەوستانسياسىندا ايلىق نورما 22 مم بولسا، 45 مم جاۋىن-شاشىن ءتۇستى، ال اقتوبەدە 30 مم نورما كەزىندە 33 مم جاۋدى. 9 ماۋسىمدا قوستاناي وبلىسىنىڭ ميحايلوۆكا ستانسياسىندا تاۋلىگىنە 64 مم (نورما 39 مم) جاۋىن تىركەلدى. 24 ماۋسىمدا جەتىسۋ وبلىسىنداعى سارقان ستانسياسىندا 49 مم (نورما 40 مم)، ال 29 ماۋسىمدا سولتۇستىك قازاقستان وبلىسىنىڭ تيميريازەۆو ستانسياسىندا 50 مم (نورما 42 مم) جاڭبىر جاۋدى.
استانادا اي ىشىندەگى ورتاشا اۋا تەمپەراتۋراسى +24،4 °C بولدى، بۇل كليماتتىق نورمادان (+19،6 °C) 4،8 گرادۋسقا جوعارى. ەڭ ىستىق كۇن 23 ماۋسىمدا تىركەلدى — +36،8 °C. ەڭ تومەنگى تەمپەراتۋرا 2 ماۋسىم ءتۇنى بايقالدى: +13،1 °C. ەلوردادا ءبىر ايدا 24 مم جاۋىن-شاشىن ءتۇستى، بۇل نورمادان (40 مم) تومەن.