تەننەسسي شتاتىنىڭ گۋبەرناتورى بيلل لي كريستا گەيل پايكتىڭ ءولىم جازاسىن كەشىرۋ تۋرالى ءوتىنىشىن قاناعاتتاندىرۋدان باس تارتتى. «كريستا گەيل پايكتىڭ كەشىرىم سۇراۋ ءوتىنىشىن مۇقيات قاراستىرىپ، ءىستى جان-جاقتى زەردەلەگەننەن كەيىن مەن تەننەسسي شتاتىنىڭ ۇكىمىن كۇشىندە قالدىرامىن جانە ىسكە ارالاسپايمىن»، — دەدى گۋبەرناتور ءوز مالىمدەمەسىندە، دەپ حابارلايدى infohub.kz سايتى.
پايكتىڭ قورعاۋشىلار توبى كەشىرىم تۋرالى ءوتىنىشتى وسى ايدىڭ باسىندا بەرىپ، ءولىم جازاسىن ءومىر بويى باس بوستاندىعىنان ايىرۋ جازاسىنا اۋىستىرۋدى سۇراعان بولاتىن.
ونىڭ ادۆوكاتتارى پايكتىڭ ءولىم جازاسىن ورىنداۋ تەننەسسيدى «ەرەكشە جاعدايعا» قوياتىنىن ايتتى: ول شتات «قازىرگى ءولىم جازاسى داۋىرىندە قىلمىس جاساعان كەزدە ءجاسوسپىرىم بولعان العاشقى ادام» بولماق.
ادۆوكاتتار ستيۆەن فەررەلل، كەللي گليسون جانە رەندي سپايۆي گۋبەرناتوردىڭ شەشىمى «تەننەسسيدىڭ ءولىم جازاسىن ورىنداۋ تارتىبىنە قاتىستى ماڭىزدى سۇراقتاردى جاۋاپسىز قالدىردى» دەپ مالىمدەدى.
«وسى شەشىممەن تەننەسسي شتاتى عىلىم دا، قۇقىقتىق جۇيەمىز دە مويىنداعان نارسەنى ەلەمەي وتىر: 18 جاستاعى ادامنىڭ ميى ەرەسەك ادامنىڭ ميى ەمەس، ال 18 جاس ءولىم جازاسىنا تارتىلۋ ءۇشىن تىم جاس»، — دەدى ولار دۇيسەنبى كۇنى جاساعان مالىمدەمەسىندە.
1995 جىلى تەننەسسي شتاتىنىڭ نوكسۆيلل قالاسىندا 19 جاستاعى كوللين سلەممەردىڭ ءمايىتى تابىلعاندا، ونىڭ كەۋدەسىنە ساتانيستىك ءراسىمنىڭ سيمۆولى — پەنتاگرامما ويىپ جازىلعانى انىقتالدى. بۇل وقيعا بۇقارالىق اقپارات قۇرالدارىندا ۇلكەن دۇربەلەڭ تۋدىردى.
پايك كولليندى ءوزىن قورلادى جانە جىگىتىن تارتىپ الماق بولدى دەپ ايىپتاعان. لاگەردەگى تاعى ەكى تۇرعىن كەيىن پايك بۇل كىسىلىك تۋرالى الدىن-الا دا، كەيىن دە ماقتانىشپەن ايتىپ، ولارعا كولليننىڭ باس سۇيەگىنىڭ ءبىر بولىگىن كورسەتكەنىن كۋالىك ەتتى.
ءبىر جىلدان كەيىن ول قاساقانا كىسى ءولتىرۋ بويىنشا كىنالى دەپ تانىلىپ، ءولىم جازاسىنا كەسىلدى، ال سول كەزدەگى جىگىتى 17 جاستاعى تاداريل شيپپ شارتتى تۇردە مەرزىمىنەن بۇرىن بوساتۋ مۇمكىندىگىمەن ءومىر بويى باس بوستاندىعىنان ايىرۋ جازاسىنا تارتىلدى.
تەننەسسي تۇزەۋ مەكەمەلەرى دەپارتامەنتىنىڭ مالىمەتىنشە، قاماۋعا الىنعان كەزدە 21 جاستاعى پايك ءولىم جازاسىن كۇتىپ وتىرعاندار اراسىنداعى ەڭ جاس ادام بولعان.
كوپ جىلدار بويى اپەللياسيالىق شاعىمدارى قاناعاتتاندىرىلماعان پايك 30 قىركۇيەكتە ءولىم جازاسىنا كەسىلۋى ءتيىس.
كولليننىڭ اناسى پايكتىڭ ءولىم جازاسىنىڭ ورىندالۋىن تالاپ ەتىپ، قىزىنىڭ «اقىرى تىنىشتىق تابۋىن» قالايتىنىن ايتتى.