اقش-تىڭ تەننەسسي شتاتىندا 50 جاستاعى كريستا پايكتىڭ ءولىم جازاسى 30 قىركۇيەككە بەلگىلەندى. ۇكىم ورىندالسا، ول وسى شتاتتا 1819 جىلدان بەرى ءولىم جازاسىنا كەسىلگەن العاشقى ايەل اتانادى، دەپ حابارلايدى infohub.kz سايتى.
كريستا پايك ءولىم جازاسىن كۇتىپ جۇرگەنىنە شامامەن 30 جىل بولدى. قازىرگى ۇكىم وعان 1996 جىلى، 18 جاسىندا جاساعان قىلمىسى ءۇشىن شىعارىلعان ەدى.
تەرگەۋ انىقتاعانداي، 1995 جىلى پايك قىزعانىشتان ءوزىن باسەكەلەس ساناعان 19 جاستاعى كۋرستاسىن ولتىرگەن. ول 17 جاستاعى جىگىتىمەن بىرگە قۇربانىن ورمانعا الىپ بارىپ، جارتى ساعات بويى ازاپتاعان. كىسى ءولتىرۋ ەرەكشە قاتىگەزدىگىمەن كوزگە ءتۇستى: مارقۇمنىڭ دەنەسىنە ساتانالىق تاڭبا ويىپ جازىلعان، ال پايك ولتىرىلگەن قىزدىڭ باس سۇيەگىنىڭ ءبىر بولىگىن ولجا رەتىندە الىپ كەتكەن.
سوتتالعان ايەلدىڭ قورعاۋشىلارى ۇكىمنىڭ ورىندالۋىن سوڭعى ساتكە دەيىن توقتاتۋعا تىرىستى. ادۆوكاتتار شتات گۋبەرناتورىنا 226 بەتتەن تۇراتىن ءوتىنىش جولداپ، كەشىرىم سۇرادى. زاڭگەرلەر پايكتىڭ اۋىر بالالىق شاعىن، باسىنان وتكەرگەن زورلىق-زومبىلىعىن، سونداي-اق بيپوليارلىق جانە پوستتراۆماتيكالىق بۇزىلىستار سياقتى پسيحياتريالىق دياگنوزدارىن العا تارتتى.
ادۆوكاتتار ءولىم جازاسى جاراقات العان ءجاسوسپىرىم جاساعان قىلمىس ءۇشىن تىم اۋىر جازا دەپ تالاپ ەتتى. الايدا تەننەسسي گۋبەرناتورى ءوتىنىشتى قابىلداماي، ۇكىمدى كۇشىندە قالدىردى.
ايتا كەتەيىك، پايكتىڭ سىبايلاسى 1996 جىلى ءولىم جازاسىنان قۇتىلىپ، ءومىر بويى باس بوستاندىعىنان ايىرۋ جازاسىنا كەسىلگەن. سوت قىلمىس جاسالعان كەزدە ونىڭ كامەلەتكە تولماعانىن ەسكەرگەن.