امەريكاندىق رەتتەۋشى NHTSA Tesla كومپانياسىن 20 مىڭعا جۋىق ەلەكتروموبيلدەگى جارىق فارالاردىڭ شامادان تىس جارىقتىعىنا بايلانىستى اقاۋدى جويۋعا مىندەتتەدى. ۆەدومستۆو ءاۆتوندىرۋشىنىڭ ماسەلەنى ەلەۋسىز دەپ تانۋ تۋرالى ءوتىنىشىن قابىلدامادى، دەپ حابارلايدى infohub.kz سايتى.
اقش-تىڭ جول قوزعالىسى قاۋىپسىزدىگى ۇلتتىق باسقارماسى (NHTSA) Tesla كومپانياسىنىڭ Model Y جانە Model 3 ۇلگىلەرىندەگى كەيبىر ەلەكتروموبيلدەردە جارىق فارالاردىڭ جارىقتىعى رۇقسات ەتىلگەن قاۋىپسىزدىك نورمالارىنان اسىپ كەتكەنىن انىقتادى. ماسەلە شامامەن 19 900 كولىككە قاتىستى. رەتتەۋشىنىڭ مالىمەتىنشە، جارىقتىڭ شامادان تىس قارقىندىلىعى جۇرگىزۋشى مەن جول قوزعالىسىنىڭ باسقا قاتىسۋشىلارىنىڭ كورىنۋىن تومەندەتىپ، اپات ءقاۋپىن ارتتىرادى.
ءوندىرۋشى بۇل ماسەلەنى 2024 جىلدىڭ كوكتەمىندە نەمەسە ودان دا ەرتە بىلگەن. سول كەزدە Tesla كومپانياسى رەتتەۋشىگە اۆتوكولىك يەلەرىنىڭ شاعىمدارىنىڭ جوقتىعىن العا تارتىپ، اۋىتقۋدى «قاۋىپسىزدىك ءۇشىن ەلەۋسىز» دەپ تانۋدى سۇراپ، پەتيسيا جىبەرگەن. كەيبىر جاعدايلاردا فارالاردىڭ جارىقتىعى زاڭمەن رۇقسات ەتىلگەن نورمادان ەكى ەسە دەرلىك اسىپ كەتكەن.
الايدا 17 شىلدەدە NHTSA ءاۆتوندىرۋشىنىڭ پەتيسياسىن رەسمي تۇردە قابىلدامادى. ۆەدومستۆو تاۋەكەلدەردى باعالاۋ كەزىندە ادامدارعا تونەتىن الەۋەتتى ءقاۋىپ ەسكەرىلەتىنىن، ال شاعىمداردىڭ بولماۋى بۇزۋشىلىقتاردى ەلەمەۋگە نەگىز بولمايتىنىن اتاپ ءوتتى.