قىتايداعى ەڭ ءىرى اۆتوكولىك كەرى شاقىرۋ ناۋقانى 4 ميلليوننان استام كولىكتى قامتىدى. ونىڭ سەبەبى — ەلەكتروموبيلدەردىڭ ايرىقشا بەلگىسىنە اينالعان جاسىرىن ەسىك تۇتقالارى. قىتايدا شىعارىلعان 2،98 ميلليون Tesla كولىگى كەرى شاقىرىلدى، سەبەبى توتەنشە جاعدايدا بۇل تۇتقالاردى تابۋ جانە اشۋ قيىنعا سوعادى. سونداي-اق، XPeng، Xiaomi جانە Geely سياقتى قىتايلىق وندىرۋشىلەردىڭ كولىكتەرى دە كەرى شاقىرۋ تىزىمىنە ەنگىزىلدى.
يلون ماسكتىڭ Tesla كومپانياسى تانىمال ەتكەن جاسىرىن ەسىك تۇتقالارى كولىك ەسىگىنىڭ پانەلىنە تىعىز ورنالاسىپ، جۇرگىزۋشى جاقىنداعاندا عانا سىرتقا شىعادى. بۇل ديزاين قىتايدا Xiaomi ەلەكتروموبيلدەرى قاتىسقان ەكى اپاتتان كەيىن سىنعا ۇشىرادى. سول وقيعالاردا ەلەكتر قۋاتىنىڭ ءوشۋى ەسىكتەردىڭ اشىلۋىنا كەدەرگى كەلتىرگەن دەگەن كۇدىك بار.
Tesla جۇما كۇنى تاراتقان مالىمدەمەسىندە Model 3، Y، S جانە X ۇلگىلەرىنىڭ كەيبىر كولىكتەرىن كەرى شاقىراتىنىن حابارلادى. سەبەپ — ەسىك تۇتقالارىنىڭ ءتۇسى ىشكى ارلەۋمەن بىردەي بولعاندىقتان، ولاردى اجىراتۋ جانە پايدالانۋ قيىن. بۇل، اسىرەسە، كولىكتىڭ تومەن ۆولتتى جۇيەسى ىستەن شىققان اۋىر سوقتىعىس كەزىندە، جولاۋشىلار مەن قۇتقارۋشىلاردىڭ ەسىكتى تەز اشۋىنا كەدەرگى كەلتىرۋى مۇمكىن. Tesla كەرى شاقىرىلعان كولىكتەرگە ەسكەرتۋ بەلگىلەرىن ورناتىپ، سوقتىعىستان كەيىن تەرەزەلەردى اۆتوماتتى تۇردە تۇسىرەتىن باعدارلامالىق جاڭارتۋ شىعاراتىنىن مالىمدەدى.
زارداپ شەككەن كومپانيالاردىڭ الەمنىڭ باسقا ەلدەرىندە دە وسىنداي كەرى شاقىرۋ جاسايتىنى بەلگىسىز. BBC بۇل ماسەلە بويىنشا Tesla، XPeng، Xiaomi جانە Geely كومپانيالارىنا سۇراۋ جولدادى.
اقپان ايىندا جۇڭگو بيلىگى جاسىرىن ەسىك تۇتقالارىنا تىيىم سالاتىنىن جاريالاعان بولاتىن. 2027 جىلدىڭ 1 قاڭتارىنان باستاپ كۇشىنە ەنەتىن جاڭا ەرەجەلەرگە سايكەس، قىتايدا تەك ەسىكتەرىنىڭ ىشكى جانە سىرتقى جاعىندا مەحانيكالىق اشۋ تەتىگى بار كولىكتەر عانا ساتىلا الادى.
Tesla-نىڭ ەسىك تۇتقالارى اقش-تىڭ قاۋىپسىزدىك رەتتەۋشىلەرىنىڭ تەكسەرۋىنە دە ىلىككەن. ولار كەنەتتەن ىستەن شىعىپ، بالالاردىڭ كولىك ىشىندە قامالىپ قالۋى تۋرالى حابارلامالار تۇسكەننەن كەيىن تەكسەرۋ باستالعان ەدى. شىلدە ايىندا اقش-تىڭ ۇلتتىق جول قوزعالىسى قاۋىپسىزدىگى باسقارماسى بارلىق اۆتوكولىك وندىرۋشىلەرى ءۇشىن جاڭا قاۋىپسىزدىك ستاندارتىن ەنگىزۋدى ۇسىندى. BBC بۇل اگەنتتىككە دە سۇراۋ جولدادى.