اقش-تىڭ Tesla كومپانياسى مەن بىرنەشە قىتايلىق ەلەكتروموبيل وندىرۋشىلەرى قاۋىپسىزدىك ماسەلەلەرىنە، نەگىزىنەن ەسىك تۇتقالارىنا بايلانىستى 4 ميلليوننان استام كولىكتى كەرى قايتارىپ جاتىر. بۇل تۋرالى جۇما كۇنى جۇڭگو بيلىگى حابارلادى، دەپ infohub.kz سايتىنا سىلتەمە جاسايدى.
قىتايدىڭ مەملەكەتتىك نارىقتى رەتتەۋ باسقارماسىنىڭ مالىمەتىنشە، امەريكاندىق ءوندىرۋشى قىتايدا شىعارىلعان جانە يمپورتتالعان Model 3، Model Y، Model X جانە Model S ۇلگىلەرىندەگى شامامەن 2،98 ميلليون كولىكتى ەسىك تۇتقاسىنىڭ قاۋىپسىزدىك تاۋەكەلدەرىنە بايلانىستى كەرى قايتارادى. قىتايلىق ب ا ق بۇل جىلداعى ەڭ ءىرى كەرى قايتارۋ ەكەنىن حابارلايدى.
بۇل شەشىم جۇڭگو بيلىگىنىڭ اقپان ايىندا كەلەسى جىلدان باستاپ Tesla مەن كوپتەگەن قىتايلىق ەلەكتروموبيلدەردە كەڭىنەن قولدانىلاتىن جاسىرىن ەسىك تۇتقالارىنا تىيىم سالاتىنىن جاريالاعانىنان بىرنەشە اي وتكەن سوڭ قابىلداندى. جۇڭگو سوڭعى ۋاقىتتا ەلدەگى جانە باسقا ەلدەردەگى ەلەكتروموبيل اپاتتارىنان كەيىن جاسىرىن نەمەسە تەگىس ەسىك تۇتقالارىنا قاتىستى تەكسەرۋدى كۇشەيتتى. مۇنداي اپاتتاردا جاسىرىن ەلەكتروندى ەسىكتەر ىستەن شىعىپ، ادامدار ىشىندە قالىپ قويعان.
جۇڭگو رەتتەۋشىسىنىڭ ۆەب-سايتىنداعى حابارلامادا قاۋىپسىزدىك تاۋەكەلى اتاپ ءوتىلدى. وندا ەلەكتر جۇيەسىنىڭ ىستەن شىعۋىنا اكەلەتىن اۋىر سوقتىعىس سياقتى توتەنشە جاعدايلاردا ەسىك تۇتقالارى جولاۋشىلاردىڭ ەسىكتى تەز اشىپ قۇتىلۋىنا كەدەرگى كەلتىرۋى نەمەسە سىرتتان كەلگەن قۇتقارۋشىلاردىڭ كىرۋىنە جول بەرمەۋى مۇمكىن ەكەندىگى ايتىلعان. Tesla تاۋەكەلدەردى ازايتۋ ءۇشىن كولىكتەرگە باعدارلامالىق جاڭارتۋلار جاسايتىنىن مالىمدەدى. كومپانيا جۇما كۇنى تۇسىنىكتەمە سۇراۋعا دەرەۋ جاۋاپ بەرمەدى.
بەيجىڭدە ورنالاسقان قىتايلىق تەحنولوگيالىق الىپ Xiaomi 390 مىڭنان استام كولىكتى كەرى قايتارىپ جاتىر. حانچجوۋداعى Leapmotor 370 مىڭنان استام كولىكتى كەرى قايتارادى. Geely جانە XPENG سياقتى باسقا قىتايلىق وندىرۋشىلەر دە كەيبىر كولىكتەردى كەرى قايتارۋدا. ءار جاعدايدا سەبەپتەر ۇقساس، نەگىزىنەن ەسىك تۇتقالارىنا قاتىستى.
جۇڭگو كوممۋنيستىك پارتياسىنىڭ رەسمي گازەتى «جەنمين جيباو» جاريالاعان ماقالادا جاپپاي كەرى قايتارۋ جاسىرىن ەسىك تۇتقالارىنا تىيىم سالۋ 2027 جىلى كۇشىنە ەنگەنگە دەيىن بار قولدانىستاعى كولىك ۇلگىلەرىنە «ءبىرىڭعاي قاۋىپسىزدىك جاڭارتۋى» رەتىندە قىزمەت ەتەتىنى ايتىلعان. گازەتتىڭ پىكىرىنشە، قارقىندى دامىپ كەلە جاتقان جەك (جاڭا ەنەرگيا كولىكتەرى) يندۋسترياسىندا باسەكەلەستىك تەك تەحنولوگيالىق يننوۆاسيا قارقىنىمەن عانا ەمەس، سونىمەن قاتار قاۋىپسىزدىككە قويىلاتىن جوعارى ستاندارتتارمەن دە ايقىندالۋى كەرەك.