اقش-تىڭ تەحاس شتاتىندا بالىقشى سەباستيان بەنيتەس ترينيتي وزەنىنەن ەرەكشە بالىق — ەجەلگى شورتان تۇرلەرىنىڭ سيرەك گيبريدىن اۋلادى. عالىمداردىڭ باعالاۋىنشا، بۇل بالىقتاردىڭ ەۆوليۋسيالىق جەلىلەرى دينوزاۆرلار داۋىرىندە، شامامەن 100 ملن جىل بۇرىن بولىنگەن، دەپ حابارلايدى infohub.kz سايتى.
بەنيتەس ترينيتي وزەنىندە بالىق اۋلاعان، وندا بۇرىن دا ءىرى ولجالارعا كەزىككەن. الايدا بۇل جولى ول سيرەك گيبريدتى — الليگاتور شورتانىنىڭ ۇرعاشىسى مەن ۇزىن تۇمسىقتى شورتاننىڭ ەركەگىن ۇستادى.
ەكى ءتۇر دە بالىقتاردىڭ ەڭ ەجەلگى ەۆوليۋسيالىق جەلىلەرىنىڭ بىرىنە جاتادى جانە ادامداردان دا، ءتىپتى دينوزاۆرلاردان دا بۇرىن پايدا بولعان. ولاردىڭ ورتاق اتا-تەگى شامامەن 100 ملن جىل بۇرىن ءومىر سۇرگەن، سوندىقتان اۋلانعان گيبريد وسى ەجەلگى جەلىنىڭ وكىلى سانالادى. مۇنداي بالىقتاردىڭ بۋدانداسۋى وتە سيرەك كەزدەسەدى جانە پوپۋلياسيانىڭ شامامەن 1–2%-ىن عانا قۇرايدى.
ەرەكشە بالىقتى باسى مەن اۋزىنىڭ پىشىنىنەن تانۋعا بولادى. الليگاتور شورتانىنىڭ باسى قىسقا ءارى جالپاق، ال ۇزىن تۇمسىقتى شورتاننىڭ اتى ايتىپ تۇرعانداي، ۇزىن ءارى تار. گيبريدتىڭ اۋزى ەكى ءتۇردىڭ دە بەلگىلەرىن بىرىكتىرگەن سوزىلىڭقى ءۇشبۇرىشتى بولىپ شىققان.
ايتپاقشى، بۇل ەجەلگى بالىقتاردىڭ تاعى ءبىر ەرەكشەلىگى بار. ولاردا ومىرتقالىلار اراسىندا ەڭ تومەن گەنەتيكالىق مۋتاسيا دەڭگەيى انىقتالعان. عالىمدار مۇنى دنق-نى قالپىنا كەلتىرۋدىڭ ءتيىمدى جۇيەسىمەن بايلانىستىرادى جانە ونى زەرتتەۋ قاتەرلى ىسىك اۋرۋىن زەرتتەۋگە كومەكتەسەدى دەپ ەسەپتەيدى.
بۇعان دەيىن Kursiv LifeStyle انتاركتيدادا شامامەن 55 ملن جىلدىق جىرتقىش سۇتقورەكتىنىڭ تاسقا اينالعان ءىزىن تاپقانىن جازعان. مونەتا مولشەرىندەي ءىز كينگ-دجوردج ارالىنداعى ۆۋلكاندىق بالشىقتا ساقتالعان.