اقش-تىڭ وڭتۇستىگىندەگى تەحاس شتاتىندا جۇمىس جىلقىسى ەت قورەكتى پارازيت — جاڭا دۇنيەلىك مياز دەرتىنە شالدىقتى. بۇل — وسى دەرتكە اقش-تا تىركەلگەن العاشقى جىلقى جاعدايى، دەپ حابارلايدى infohub.kz سايتى.
زيانكەس پرەسيديو وكرۋگىندەگى جۇمىس جىلقىسىنىڭ ارتقى اياعىنان تابىلدى. بۇل تۋرالى بەيسەنبى كۇنى امەريكالىق ات سپورتى قورى مالىمدەدى.
قور جىلقى يەلەرىنە مالدى كۇن سايىن تەكسەرۋدى، جاراقات، جاعىمسىز ءيىستى نەمەسە قۇرتتى بايقاۋدى ۇسىندى. مياز — شىبىن دەرناسىلى — اشىق جاراقاتقا ەنىپ، ونى قۇرتتاي الادى.
«جىلقىلاردى كۇن سايىن تەكسەرىڭىز، جاراقاتتى تازا ۇستاپ، ۆەتەريناردىڭ نۇسقاۋىمەن جابىڭىز، ۆەتەرينار ۇسىنعان شىبىنعا قارسى قۇرالداردى قولدانىڭىز جانە شىبىن ماسكاسى، جامىلعى سياقتى كەدەرگىلەرمەن شىبىننىڭ جولىن شەكتەڭىز، قاجەت بولعاندا قورانى تازا ۇستاڭىز»، — دەلىنگەن قور مالىمدەمەسىندە.
تەحاس مال دەنساۋلىعى كوميسسياسى جاڭا وشاقتاردىڭ تارالۋىن تەجەۋ ءۇشىن پرەسيديو مەن دجەفف دەۆيس وكرۋگتەرىنىڭ ءبىرقاتار بولىگىندە جانە تاعى باسقا ايماقتاردا جىلى قاندى جانۋارلاردىڭ ىندەتتى ايماقتان تىس جەرگە جىلجۋىن شەكتەدى.
وسىدان ونداعان جىل بۇرىن جويىلعان سوڭ، مياز ماۋسىم ايىندا اقش-مەكسيكا شەكاراسىنا جاقىن ساۆالا وكرۋگىندە بۇزاۋدان تابىلعان بولاتىن. مەكسيكادا مياز ىندەتى بۇكىل ەلگە تارادى.
اقش اۋىل شارۋاشىلىعى دەپارتامەنتىنىڭ مالىمەتىنشە، بيىل تىركەلگەن 49 جاعدايدىڭ بارلىعى تەحاستا بولدى، تەك بىرەۋى نيۋ-مەكسيكو شتاتىندا — وندا زيانكەس يتتەن تابىلعان.
جانۋارلاردا اۋىر جاراقات نەمەسە ولىمگە اكەلۋى مۇمكىن ءپارازيتتىڭ قايتا ءورشۋى تەحاس فەرمەرلەرىنە قارجىلىق زور شىعىن اكەلۋى مۇمكىن دەگەن الاڭداۋشىلىق تۋدىردى.
تەحاس گۋبەرناتورى گرەگ ەببوتت ماۋسىم ايىندا ميازدىڭ وسۋىنە قارسى كۇرەسۋ ءۇشىن شتات رەسۋرستارىن جۇمىلدىرۋ ماقساتىندا اپات جاريالادى.
زيانكەس اقش جەرىنەن تابىلعانعا دەيىن ترامپ اكىمشىلىگى ەدينبۋرگتە ستەريلدى شىبىن تاراتۋ نىسانىن ىسكە قوسۋدى جاريالاعان ەدى. ەگەر انالىق مياز شىبىنى ستەريلدى شىبىنمەن قوسىلسا، ولاردىڭ ۇرپاعى ومىرشەڭ بولمايدى، وسىلايشا پوپۋلياسيا تەجەلەدى.
ماتەريالدى دايىنداۋعا Reuters اگەنتتىگى ۇلەس قوستى.