The Beatles تۋرالى ءتورت ءفيلمنىڭ اۆتورلارى مۋزىكا تاريحىنداعى ەڭ تانىمال كادرلاردىڭ ءبىرىن قايتا جاڭعىرتتى. لەگەندارلىق توپ مۇشەلەرىن سومداعان اكتەرلەر لوندونداعى Abbey Road ستۋدياسىنىڭ جانىنداعى اتاقتى وتكەلدەن ءوتىپ، كۋلتتىك فوتوسۋرەتتىڭ كومپوزيسياسىن قايتالادى، دەپ حابارلايدى infohub.kz سايتى.
ءتۇسىرىلىم كادرلارى الەۋمەتتىك جەلىلەردە وتكەن دەمالىس كۇندەرى پايدا بولدى. وندا دجون لەننون، رينگو ستارر، پول ماككارتني جانە دجوردج حارريسون رولدەرىن ورىنداۋشىلار وتكەلگە ءتىزىلىپ، بىرىنەن سوڭ ءبىرى جولدى كەسىپ ءوتىپ، اتاقتى سۋرەتتەگى مۋزىكانتتاردىڭ ورنالاسۋىن دالمە-دال قايتالاعانى كورىنەدى.
دجون لەننون ءرولىن حارريس ديكينسون سومدادى، رينگو ستارردى بارري كەوگان وينادى، پول ماككارتنيدى پول مەسكال بەينەلەدى، ال دجوردج حارريسوندى دجوزەف كۋينن ورىندادى. اكتەرلەر توپتىڭ ءتۇپنۇسقا مۇشەلەرى سياقتى رەتپەن وتكەلدەن ءوتىپ، Abbey Road البومىنىڭ مۇقاباسىنىڭ ءتىرى رەكونسترۋكسياسىن جاسادى.
ءتۇپنۇسقا فوتوسۋرەت 1969 جىلى 8 تامىزدا Abbey Road ستۋدياسىنىڭ جانىندا تۇسىرىلگەن. كادر اۆتورى — فوتوگراف يەن ماكميللان، وعان تۇسىرىلىمگە بىرنەشە مينۋت قانا بەرىلگەن. ول جولدىڭ ورتاسىنا قويىلعان باسپالداقتان التى كادر تۇسىرگەن، سولاردىڭ ءبىرى البومنىڭ مۇقاباسىنا اينالدى.
باستاپقىدا فوتوسەسسيانى نەپالدا وتكىزۋ جوسپارلانعان، ءبىراق بۇل يدەيادان باس تارتىپ، ءتۇسىرىلىمدى The Beatles ءوز البومىن جازعان ستۋديانىڭ جانىندا وتكىزۋگە شەشىم قابىلداندى.
لەگەندارلىق بريتاندىق توپ تۋرالى جاڭا جوبانى سەم مەندەس باسقارادى. ءبىر ءفيلمنىڭ ورنىنا ول بىردەن ءتورت كارتينا تۇسىرەدى، ولاردىڭ ءارقايسىسى The Beatles مۇشەلەرىنىڭ بىرىنە ارنالادى. «ليۆەرپۋلدىك تورتتىك» مۇشەلەرى تۋرالى جوبانىڭ پرەمەراسى 2028 جىلدىڭ كوكتەمىنە جوسپارلانعان.
بۇعان دەيىن Kursiv LifeStyle The Beatles بايوپيكىنىڭ العاشقى كادرلارى اشىقحاتتاردا كورسەتىلگەنىن حابارلاعان.